मुंबई - नागपूर, भिवंडी, चाकण, सिन्नर आणि पनवेल या ठिकाणी लॅाजिस्टिक पार्क आणि औद्योगिक पार्क उभारण्यासाठी राज्य सरकार ब्लॅकस्टोन ॲडहायझर्स, होरायझन इंडस्ट्रियल पार्क्स आणि एक्सएसआयओ यांच्यात आज सामंजस्य करार करण्यात आला.
या करारानुसार राज्यात १० हून अधिक आधुनिक औद्योगिक व लॉजिस्टिक पार्क उभारले जाणार आहेत. या सर्व प्रकल्पांमध्ये मिळून एकूण पाच हजार १२७ कोटी रुपये थेट परकीय गुंतवणूक होणार आहे. तसेच या करारामुळे थेट व अप्रत्यक्ष अशा रोजगाराच्या २७ हजार ५१० संधी निर्माण होणाऱ़ आहेत.
मुख्यमंत्री देवेंद्र फडणवीस यांच्या प्रमुख उपस्थितीत सह्याद्री अतिथिगृहात उद्योग सचिव डॉ. पी.अन्बळगन आणि होरायझन इंडस्ट्रियल पार्क्सचे अध्यक्ष आर.के.नारायणन यांच्या स्वाक्षरीने हा करार झाला. यावेळी उपमुख्यंत्री एकनाथ शिंदे, मुख्यमंत्र्यांच्या प्रधान सचिव अश्विनी भिडे, एमआयडीसीचे मुख्य कार्यकारी अधिकारी पी.वेलारासू, ब्लॅकस्टोन ॲडहायझर्स प्रा. लि. चे वरिष्ठ व्यवस्थापकीय संचालक तुहिन पारिख, ब्लॅकस्टोन ॲडव्हायझर्स प्रा. लि.चे व्यवस्थापकीय संचालक आलोक जैन, एक्सएसआयओ लॉजिस्टिक्स पार्क्सचे व्यवस्थापकीय संचालक आशीष अग्रवाल आदी उपस्थित होते. हा सामंजस्य करार राज्यातील प्रमुख औद्योगिक आणि मल्टिमोडल लॉजिस्टिक क्षेत्रांमध्ये आधुनिक लॉजिस्टिक आणि इंडस्ट्रियल पार्कच्या विकासासाठी होणार आहे.
आधुनिक औद्योगिक व लॉजिस्टिक पार्क उभारण्यासाठी ७९४.२ एकर जमिनीचे क्षेत्रफळ लागणार आहे. यापैकी १.८५ कोटी चौरस फूट जमिनीवर बांधकाम करण्यात येईल. हे लॉजिस्टिक पार्क नागपूर, भिवंडी, चाकण, सिन्नर, पनवेल यांसारख्या महत्त्वाच्या ठिकाणी विकसित केले जाणार आहेत. हे प्रकल्प पर्यावरणस्नेही, डिजिटल इन्फ्रास्ट्रक्चरयुक्त व रोजगारनिर्मितीस प्रोत्साहन देणारे असून, महाराष्ट्र लॉजिस्टिक धोरण २०२४ शी सुसंगत असणार आहे.
असा आहे करार...
१० - एकूण प्रकल्प
५,१२७ कोटी रुपये - एकूण गुंतवणूक
२७,५१० - रोजगाराच्या संधी
ही भागीदारी नागपूर, मुंबई, पुणे आणि इतर ठिकाणी जागतिक दर्जाचे, पर्यावरण, सामाजिक आणि शासकीय अनुकूल असे औद्योगिक व लॉजिस्टिक हब तयार करण्याच्या दिशेने पाऊल टाकणारी आहे. ही परिवर्तनात्मक भागीदारी भारतातील उत्पादन, वेअरहाउसिंग व पुरवठा साखळी उत्कृष्टतेसाठी एक सशक्त पायाभूत रचना निर्माण करेल.
- देवेंद्र फडणवीस, मुख्यमंत्री
