சிவகங்கை  மாவட்டம், திருப்புவனம் அருகே மடப்புரம் பத்ரகாளியம்மன் கோவில் காவலாளியாகப் பணிபுரிந்து வந்தவர்  அஜித்குமார். இவர், நகை திருட்டு வழக்கில் விசாரணைக்காக காவல்துறையினரால் அழைத்துச் செல்லப்பட்டு, தாக்கப்பட்டு உயிரிழந்தார். இச்சம்பவம் தமிழகத்தில் பெரும் அதிர்ச்சியையும், பரபரப்பையும் ஏற்படுத்தியது. இந்த வழக்கில், அஜித்துடன் விசாரணைக்கு அழைத்துச் செல்லப்பட்ட அவரது சகோதரர் நவீன்குமார், காவலர்களால் தாக்கப்பட்டதாக தெரிகிறது.  

ஜூலை 6 ம் தேதி  கால் பாதங்களில் ஏற்பட்ட கடுமையான வலி காரணமாக நவீன் மதுரை அரசு ராஜாஜி மருத்துவமனையின் தீவிர சிகிச்சைப் பிரிவில் அனுமதிக்கப்பட்டுள்ளார்.  நவீன்குமார், ஜூன் 28, 2025 அன்று திருப்புவனம் காவல் நிலையத்தில் விசாரணைக்காக அழைத்துச் செல்லப்பட்டபோது, காவலர்கள் தன்னை முழங்கால் போட வைத்து காலில் தாக்கியதாக புகார் தெரிவித்திருந்தார். இதனால், அவருக்கு நடப்பதில் சிரமம் ஏற்பட்டதாகவும், கால் பாதங்களில் தொடர்ந்து வலி இருப்பதாகவும் அவரது தாய்மாமா தெரிவித்தார்.
“நவீனுக்கு கால் வலி தாங்க முடியவில்லை. காவலர்கள் தாக்கியதால் இந்த நிலை ஏற்பட்டது,” என குடும்பத்தினர் கூறியுள்ளனர். இதையடுத்து, மருத்துவ பரிசோதனைக்காக நவீனை மதுரை அரசு மருத்துவமனையில் சேர்த்ததாக குடும்பத்தினர் உறுதிப்படுத்தினர்.

இச்சம்பவம், அஜித்குமாரின் மரணத்தைத் தொடர்ந்து மேலும் பரபரப்பை ஏற்படுத்தியுள்ளது. அஜித்குமாரின் உடலில் 44 காயங்கள் இருந்ததாக பிரேத பரிசோதனை அறிக்கை தெரிவித்தது.  இந்நிலையில், நவீனும் காவலர்களால் தாக்கப்பட்டதாகக் கூறப்படுவது, காவல்துறை மீதான குற்றச்சாட்டுகளை மேலும் தீவிரப்படுத்தியுள்ளது. மதுரை உயர் நீதிமன்ற அமர்வு, இந்த வழக்கை கொலை வழக்காக மாற்றி காவலர்களை கைது செய்து சிபிசிஐடி விசாரணைக்கு உத்தரவிட்டுள்ளது. “நவீனை மருத்துவமனையில் சேர்த்தது, அவரது உடல்நிலை மோசமடைந்ததால் மட்டுமே. காவலர்களின் தாக்குதல் இந்த நிலைக்கு காரணம்,” என்று குடும்பத்தினர் குற்றம்சாட்டியுள்ளனர். இதற்கிடையில், அஜித்குமாரின் குடும்பத்துக்கு 50 லட்சம் இழப்பீடு, நவீனுக்கு அரசு வேலை, மற்றும் இலவச மனை பட்டா வழங்கப்பட்டுள்ளதாக அரசு அறிவித்துள்ளது. இந்த வழக்கு, காவல்துறையின் செயல்பாடுகள் மற்றும் பொறுப்பு குறித்து மீண்டும் விவாதங்களை கிளப்பியுள்ளது.  

இதையும் பிடிச்சிருந்தா படிச்சு பாருங்க

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்

பளபளக்கும் மிருதுவான சருமத்திற்கு இதை மட்டும் செய்தாலே போதும்!!

நாப்கின்களால் ஏற்படும் ரேசஸ் மற்றும் எரிச்சலை போக்க இயற்கை வழிகள்!!

உங்க நட்சத்திரத்துக்கு லாபம் தரும் துறை எது?