स्टार प्रवाह वाहिनीवर नुकत्याच सुरु झालेल्या ‘हळद रुसली कुंकू हसलं’ या मालिकेला प्रेक्षकांचं भरभरुन प्रेम मिळत आहे. मालिकेतल्या प्रत्येक कलाकाराचं कौतुक होताना दिसतंय. या मालिकेतील जिगरबाज कृष्णा प्रेक्षकांना विशेष भावतेय. कृष्णाने तिची लाडकी गाय स्वातीला वाचवण्यासाठी एक धाडसी निर्णय घेतला आहे. शेतातल्या विहिरीत स्वाती पडल्याचं कळताच मागचा पुढचा कोणताही विचार न करता कृष्णाने या विहिरीत उडी मारली. मालिकेतला हा अतिशय कठीण प्रसंग कृष्णा म्हणजेच अभिनेत्री समृद्धी केळकरने जिद्दीने पूर्ण केला.

या अनुभवाविषयी सांगताना समृद्धीम्हणाली, “मला पोहायला येतं. मात्र इतक्या खोल पाण्यात मी कधीही उतरले नव्हते. या सीनविषयी कळताच तो कसा शूट होणार याची उत्सुकता होती. अखेर शूटचा तो दिवस उजाडला. कोल्हापुरातल्या एका शेतातल्या 40 फूट खोल विहिरीत उडी मारण्याचा सीन होता. सर्वात महत्त्वाचं म्हणजे एका टेकमध्ये हा सीन पूर्ण करायचा होता. मी कोणताही बॉडी डबल न वापरता हा सीन करण्याचं ठरवलं होतं.”

View this post on Instagram

A post shared by samruddhi kelkar (@samruddhi.kelkar)

“मनाची तयारी केली आणि मी विहिरीत उडी मारली. हा अनुभव मी कधीही विसरणार नाही. मालिकेच्या संपूर्ण टीमने यासाठी खूप मेहनत घेतली आणि माझी काळजीही घेतली. दोन पट्टीचे पोहणारे विहिरीत माझ्यासोबत होते. मला धाडसी प्रयोग करायला नेहमीच आवडतं. या सीननंतर माझा आत्मविश्वास द्विगुणीत झाला आहे असंच म्हणेन,” असं ती म्हणाली.

या सीनचा एक व्हिडीओसुद्धा तिने सोशल मीडियावर पोस्ट केला आहे. या व्हिडीओचं कॅप्शनसुद्धा तिने कृष्णाच्याच अंदाजात लिहिलंय. ‘त्ये कसाय माहित्ये का? इहिरीत उडी मारायची आहे कळल्यानंतर पोटात मोठ्ठा गोळा आला. पन कृष्णेच्या कोल्हापूरी छातीतलं बळ जागं झालं अन् आई अंबाबाईचं नाव घेऊन अस्सल शेतातल्या 30-40 फूट खोल इहिरीत मारली उडी! पार इषय हार्ड करून टाकला. भीतीने पाय मागं घेतला.. म्या न्हाय! वन टेक होता ओ. अख्ख्या टिमचा फुल्ल सपोर्ट,’ असं तिने म्हटलंय. ‘हळद रुसली कुंकू हसलं’ या मालिकेत समृद्धी केळकरसोबत अभिषेक रहाळकर मुख्य भूमिकेत आहे. ही मालिका दुपारी 1 वाजता स्टार प्रवाह वाहिनीवर प्रेक्षकांच्या भेटीला येते.