ஆசிய கோப்பை ரைசிங் ஸ்டார்ஸ் கிரிக்கெட் தொடரில், ஐக்கிய அரபு அமீரக அணிக்கு எதிரான இரண்டாவது லீக் போட்டியில் இந்தியா ஏ அணித் தரப்பில் களமிறங்கிய இளம் வீரர் வைபவ் சூர்யவன்ஷி, தனது அதிரடி ஆட்டத்தால் ரசிகர்களை மிரள வைத்தார்.

இடது கை ஆட்டக்காரரான இவர், வெறும் 17 பந்துகளில் அரை சதத்தை எட்டி இந்தியா ஏ அணிக்குச் சிறப்பான தொடக்கத்தை அளித்தார். அதன்பிறகு சிக்ஸர்களாகப் பறக்கவிட்டு எதிரணி பந்துவீச்சாளர்களைத் திணறடித்த வைபவ், வெறும் 32 பந்துகளில் தனது சதத்தைப் பதிவுசெய்து பெரும் சாதனையைப் படைத்தார்.

அவர் தனது அரை சதத்தை 5 பவுண்டரிகள் மற்றும் 3 சிக்ஸர்களுடன் 300-க்கு மேற்பட்ட ஸ்டிரைக் ரேட்டில் பதிவு செய்திருந்தார். சதத்திற்குப் பிறகும் அவரது அதிரடி தொடர்ந்தது.

இறுதியாக, வைபவ் சூர்யவன்ஷி வெறும் 42 பந்துகளில் 11 பவுண்டரிகள் மற்றும் 15 சிக்ஸர்களுடன் 144 ரன்கள் குவித்து ஆட்டமிழந்தார். இவரின் இந்த மிரட்டல் ஆட்டத்தால், இந்தியா ஏ அணி 15 ஓவர்களின் முடிவில் 3 விக்கெட் இழப்பிற்கு 232 ரன்கள் என்ற இமாலய இலக்கை நிர்ணயித்தது.

மற்றொரு முனையில், நாமன் தீர் 23 பந்துகளில் 34 ரன்கள் எடுத்து வைபவுக்குச் சிறப்பாகத் துணையாக இருந்தார். இந்தத் தொடரில் வைபவின் இந்தச் சிறப்பான ஆட்டம், ஐபிஎல் 2025 சீசனில் அவர் ராஜஸ்தான் ராயல்ஸ் அணிக்காக விளையாடி 251 ரன்கள் (ஒரு சதம் உட்பட) குவித்ததைத் தொடர்ந்து கிடைத்துள்ளது.

15 வயதான இந்த இளம் வீரரை ராஜஸ்தான் ராயல்ஸ் அணி அடுத்த சீசனுக்கும் தக்கவைக்கும் என எதிர்பார்க்கப்படுகிறது. இந்தப் போட்டியில் ஐக்கிய அரபு அமீரக பந்துவீச்சாளர்களான முஹம்மது ரோஹித் கான், முஹம்மது ஃபராசுதீன், ஆயன் அஃப்சல் கான் உள்ளிட்டோர், வைபவின் அதிரடியால் ரன்களை வாரி வழங்கினர். இந்தப் போட்டி, இந்தியா ஏ அணிக்கு ஒரு சிறப்பான வெற்றியைப் பெற்றுத் தர வாய்ப்புள்ளது.