இந்தியா வந்துள்ள தென் ஆப்ரிக்க அணி 5 போட்டிகள் கொண்ட டி-20 தொடரில் பங்கேற்றது. முதல் மூன்று போட்டிகளின் முடிவில் இந்தியா 2-1 என முன்னிலையில் இருந்தது. லக்னோவில் நடக்க வேண்டிய நான்காவது போட்டி மோசமான வானிலை காரணமாக ரத்தான நிலையில், ஐந்தாவது மற்றும் கடைசிப் போட்டி டிசம்பர் 19 அன்று ஆமதாபாத்தில் உள்ள நரேந்திர மோடி மைதானத்தில் நடைபெற்றது. இதில் டாஸ் வென்ற தென் ஆப்ரிக்க கேப்டன் மார்க்ரம் பந்துவீச்சைத் தேர்வு செய்தார். இந்திய அணியில் காயமடைந்த கில்லுக்குப் பதிலாக பும்ரா சேர்க்கப்பட்டார்.

இந்திய அணிக்கு சஞ்சு சாம்சன் மற்றும் அபிஷேக் சர்மா ஜோடி சிறப்பான தொடக்கத்தை அளித்தது. சஞ்சு சாம்சன் 22 பந்துகளில் 37 ரன்கள் எடுத்து ஆட்டமிழந்தார். அவரைத் தொடர்ந்து அபிஷேக் சர்மா 21 பந்துகளில் 34 ரன்கள் எடுத்து வெளியேறினார். கேப்டன் சூர்யகுமார் யாதவ் 5 ரன்களில் ஏமாற்றம் அளித்தாலும், இந்திய அணி வலுவான அடித்தளத்தை அமைத்திருந்தது.

மத்திய வரிசையில் இணைந்த திலக் வர்மா மற்றும் ஹர்திக் பாண்ட்யா ஜோடி தென் ஆப்ரிக்க பந்துவீச்சைத் தும்சம் செய்தது. திலக் வர்மா 73 ரன்கள் எடுத்து ரன் அவுட் ஆனார். மறுபுறம் அதிரடி காட்டிய பாண்ட்யா 25 பந்துகளில் 63 ரன்கள் குவித்து ஆட்டமிழந்தார். இவர்களின் சிறப்பான ஆட்டத்தால், இந்திய அணி 20 ஓவர் முடிவில் 5 விக்கெட் இழப்புக்கு 231 ரன்கள் என்ற இமாலய இலக்கை எட்டியது. சிவம் துபே 10 ரன்களுடன் இறுதிவரை களத்தில் இருந்தார்.

32 ரன்கள் என்ற கடின இலக்கை நோக்கி ஆடிய தென் ஆப்ரிக்க அணியின் ஹென்றிக்ஸ் 11 ரன்னில் வெளியேறினார். ஆனால், அதன்பின் இணைந்த டி காக் மற்றும் டிவால்ட் பிராவிஸ் ஜோடி இந்திய பந்துவீச்சைச் சிதறடித்தது. இதனால் தென் ஆப்ரிக்கா முதல் 10 ஓவர்களில் ஒரு விக்கெட் இழப்புக்கு 118 ரன்கள் எடுத்து மிகவும் வலுவான நிலையில் இருந்தது.

ஆட்டம் தென் ஆப்ரிக்கா பக்கம் செல்வது போல் தெரிந்த நிலையில், இந்திய பந்துவீச்சாளர்கள் சிறப்பாகச் செயல்பட்டனர். அரைசதம் கடந்த டி காக் (63) மற்றும் பிராவிஸ் (31) அடுத்தடுத்து ஆட்டமிழந்தனர். குறிப்பாக வருண் சக்ரவர்த்தியின் சுழலில் தென் ஆப்ரிக்க பேட்டர்கள் திணறினர். இறுதியில் தென் ஆப்ரிக்க அணி 20 ஓவர்களில் 8 விக்கெட் இழப்புக்கு 201 ரன்கள் மட்டுமே எடுத்து, 30 ரன்கள் வித்தியாசத்தில் தோல்வியடைந்தது.

இந்த வெற்றியின் மூலம் 5 போட்டிகள் கொண்ட டி-20 தொடரை 3-1 என்ற கணக்கில் இந்திய அணி கைப்பற்றி சாதனை படைத்தது. இந்திய தரப்பில் வருண் சக்ரவர்த்தி 4 விக்கெட்டுகளையும், பும்ரா 2 விக்கெட்டுகளையும் வீழ்த்தினர். ஆட்டநாயகனாக ஹர்திக் பாண்ட்யாவும், தொடர் முழுவதும் சிறப்பாகப் பந்துவீசிய வருண் சக்ரவர்த்தி தொடர் நாயகனாகவும் தேர்ந்தெடுக்கப்பட்டனர்.