தனுஷ் வேலையில்லா பட்டதாரி படத்தை எடுத்த போது அந்த படத்தில் உதவி இயக்குனர் போல வேலை செய்தவர் விக்னேஷ் சிவன். அந்த படத்தில் ஒரு சின்ன வேடத்தில் விக்னேஷ் சிவன் நடித்தும் இருந்தார். அதன்பின் விக்னேஷ் சிவன் சிம்புவை வைத்து போடா போடி என்கிற திரைப்படத்தை இயக்கி கோலிவுட்டில் இயக்குனராக அறிமுகமானார். அந்த படம் ஓடவில்லை. ஆனாலும் அவர் மீது நம்பிக்கை வைத்து தனது சொந்த தயாரிப்பில் விஜய் சேதுபதி, நயன்தாராவை வைத்து நானும் ரவுடிதான் படத்தை இயக்கும் வாய்ப்பை அவருக்கு கொடுத்தார் தனுஷ்..

ஆனால், ஷூட்டிங் ஸ்பாட்டில் நயன்தாராவுடன் ரொமான்ஸ் செய்து கொண்டு சொன்ன பட்ஜெட்டை விட அதிக செலவு செய்ததால் கடுப்பான தனுஷ் இதற்கு மேல் என்னால் பணம் கொடுக்க முடியாது என மறுத்துவிட்டார். எனவே, தனது காதலனுக்காக நயன்தாரா தனது சொந்த காசை போட்டு படத்தை முடிக்க உதவி செய்தார்.. அப்படி உருவானதுதான் ரவுடி பிக்சர்ஸ்.

அந்த படம் வெற்றி என்றாலும் தனுஷ் விக்னேஷ் சிவனையோ, நயன்தாராவையோ சந்திக்கவே இல்லை. அவர்களுடனான நட்பையும் அவர் முறித்துக்கொண்டார். அதோடு நயன்தாரா தனது திருமண வீடியோவை நெட்பிலிக்ஸுக்கு விற்றபோது அதில் நானும் ரவுடிதான் படப்பிடிப்பில் எடுக்கப்பட்ட சில புகைப்படங்கள் மற்றும் வீடியோக்களையும் அவர்கள் சேர்க்க அதற்கு எதிர்ப்பு தெரிவித்து வக்கீல் நோட்டீஸ் அனுப்பினார் தனுஷ். இதனால் கோபமடைந்த நயன்தாரா தனுஷை திட்டி ஒரு பெரிய அறிக்கையை வெளியிட்டார். ஆனால், தனுஷ் அமைதியாக இருந்தார்.

அப்போது தனுசுக்கு எதிராக சில கருத்துக்களை விக்னேஷ் சிவனும் பேசினார். இந்நிலையில், சமீபத்தில் ஊடகம் ஒன்றுக்கு பேட்டி கொடுத்த விக்னேஷ் சிவன் ‘எனக்கு தனுஷ் சாரை மிகவும் பிடிக்கும்.. வேலையில்லா பட்டதாரி படம் உருவானபோது இரண்டரை வருடங்கள் நான் அவருடன்தான் இருந்தேன்..

அவர் சாப்பிட்டால்தான் நான் சாப்பிடுவேன்.. அப்படி ஒரு அன்பு எங்களுக்குள் இருந்தது.. தனுஷ் சாரின் பிறந்தநாளான ஜூலை 28ம் தேதிதான் என் அப்பா இறந்தார். எனவே, தனுஷை என் அப்பாவை போல நான் கருதுகிறேன். ஆனால் சில விஷயங்கள் நம் கையை மீறி நடக்கிறது. சூழ்நிலை அப்படி இருந்தது.. சில தவறுகள் நடந்தது.. அவரின் நட்பை இழந்ததை பெரிய இழப்பாக நினைக்கிறேன்’ என பீல் பண்ணி பேசியிருருக்கிறார்.