India A vs Sri Lanka A thrilling match report : भारत अ संघाने तिरंगी मालिकेतील पहिल्या सामन्यात यजमान श्रीलंका अ संघावर रोमहर्षक विजय मिळवला. २७८ धावांच्या लक्ष्याचा पाठलाग करताना श्रीलंका विजयपथावर होती, परंतु भारतीय गोलंदाजांनी शेवटच्या षटकांत सामन्याला कलाटणी दिली. त्यामुळे ऋतुराज गायकवाडचे ( Ruturaj Gaikwad Century) शतक व्यर्थ जातेय की काय, ही भीती नाहीशी झाली. भारतीय संघाचे निवड समिती प्रमुख अजित आगरकर ( Ajit Agarkar) हा सामना पाहण्यासाठी डांबुला येथे उपस्थित होते आणि त्यांच्या उपस्थितीत भारताने उल्लेखनीय कामगिरी केली.

वैभव सूर्यवंशी (१४) व प्रभसिमरन सिंग ( २) यांना सलामीला आलेल्या अपयशानंतर भारत अ संघाने तिरंगी मालिकेच्या पहिल्या वन डे सामन्यात ६ बाद २७७ धावांपर्यंत मजल मारली. प्रियांश आर्य व ऋतुराज गायकवाड यांनी तिसऱ्या विकेटसाठी ५३ धावांची भागीदारी करून श्रीलंका अ संघाला प्रत्युत्तर दिले. पण, प्रियांश ( ३२) दुर्दैवी रन आऊट झाला. मात्र, ऋतुराज व कर्णधार तिलक वर्मा, ही जोडी मैदानावर उभी राहिली. दोघांनी १५० धावांची भागीदारी केली.

ऋतुराजने लिस्ट ए क्रिकेटमधील त्याचे २१ वे शतक पूर्ण करताना ११४ चेंडूंत ६ चौकार व ३ षटकारांसह १०१ धावांची खेळी केली. तिलकने ६० धावा केल्या, तर आयुष बडोनी ( २४) व सूयांश शेडगे ( २६) यांनी चांगले योगदान दिले. श्रीलंकेच्या मोहमद शिराजने दोन विकेट्स घेतल्या. श्रीलंकेला निरोशान डिकवेला व अविष्का फर्नांडो यांनी ९३ धावांची सलामी देत, दमदार सुरूवात करून दिली. डिकवेला ( ४७) व फर्नांडो ( ४५) यांना आयुष बडोनीने माघारी पाठवले.