इंग्लंडचा कसोटी कर्णधार बेन स्टोक्स वादात अडकल्याने अडचणीत वाढ झाली आहे. न्यूझीलंडविरुद्ध पहिला कसोटी सामना जिंकल्यानंतर नाईक्लबमध्ये जल्लोष केला होता. इतकंच काय तिथे मारहाणही केली. आता असं वागणं त्याच्या अंगलट येण्याची शक्यता आहे. कारण नाईटक्लबमध्ये जाणं आणि तिथे वाद घातल्याप्रकरणी इंग्लंड क्रिकेट बोर्डाने तपास सुरू केला आहे. . इंग्लंडच्या मिडियामध्ये मागच्या 24 तासांपासून स्टोक्स आणि एटकिन्सन यांनी नाइटक्लबमध्ये मारहाण केल्याचा मुद्दा चांगलाच गाजला आहे. या मुद्द्यामुळे संघाच्या वागण्यावर पुन्हा एकदा प्रश्नचिन्ह उपस्थित झालं आहे. यावेळेस खुद्द कर्णधार बेन स्टोक्स अडकला आहे. असं असताना इंग्लंडचा कर्णधार फक्त कर्णधारपद नाही तर क्रिकेटमधून निवृत्ती घेण्याच्या तयारीत असल्याचं बोललं जात आहे
ईएसपीएन क्रिकइन्फोच्या रिपोर्टनुसार, स्टोक्स दोषी आढळल्यास त्याला कर्णधारपद गमवावं लागू शकतं. इतकंच काय तर पुढच्या सामन्यातून किंवा संपूर्ण मालिकेला मुकावं लागू शकते. मिडिया रिपोर्टनुसार, नाईटक्लबमध्ये सुरक्षारक्षकाला मारहाण केल्याने त्याला गंभीर दुखापत झाली असून टाके पडले आहे. दुसरीकडे, स्टोक्स आणि एटकिन्सला कोणतीही दुखापत झालेली नाही. या प्रकरणाची इंग्लंड क्रिकेट बोर्डाने चौकशी सुरू केली आहे. इंग्लिश क्रीडा वेबसाइट टॉकस्पोर्टने एका अहवालात दावा केला आहे की, स्टोक्स केवळ कर्णधारपदच नव्हे, तर आंतरराष्ट्रीय क्रिकेटही सोडू शकतो.
वृत्तानुसार, इंग्लंडचा कर्णधार स्टोक्स आणि पाच बळी घेणारा वेगवान गोलंदाज एटकिन्सन हे 7 जून रोजी कसोटी सामना जिंकल्यानंतर त्या रात्री उशिरा एका नाईटक्लबमध्ये आनंद साजरा करत होते. तिथेच इंग्लिश रग्बी क्लबचे खेळाडू हंगाम संपल्यानंतर आनंद साजरा करत होते. एका मुद्द्यावरून त्यांच्यात वाद झाला आणि त्याचं रुपांतर मारहाणीत झालं. दरम्यान, इंग्लंड आणि न्यूझीलंड यांच्यातील दुसरा कसोटी सामना 17 जूनपासून ओव्हल येथे होणार आहे. या सामन्यात बेन स्टोक्स आणि गट एटकिन्सन हे नसतील असं बोललं जात आहे.
कसोटी सामन्यात प्रथम फलंदाजी करताना इंग्लंडचा संघ 140 धावांवर बाद झाला होता. त्यानंतर न्यूझीलंडला 113 धावांवर रोखलं. त्यामुळे 27 धावांची आघाडी मिळाली आणि दुसऱ्या डावात इंग्लंडने 226 धावा केल्या. विजयासाठी 253 धावांचं आव्हान दिलं. हे आव्हान गाठताना न्यूझीलंडचा संघ 138 धावांवर बाद झाला. हा सामना इंग्लंडने 115 धावांनी जिंकला आणि तीन सामन्यांच्या मालिकेत 1-0 आघाडी घेतली आहे.
