ஈரானுடன் நடைபெற்று வரும் போருக்கு மத்தியில், அமெரிக்காவிற்கு ஏற்பட்ட ஒரு பெரும் பின்னடைவாக, அந்நாட்டின் ராணுவச் செயலாளர் டிரெய்ன் டிரிஸ்கால் தனது பதவியை ராஜினாமா செய்துள்ளார். அமெரிக்க பாதுகாப்புச் செயலாளர் பீட் ஹெக்ஸெத்துடன் ஏற்பட்ட கருத்து வேறுபாடுகளைத் தொடர்ந்து, அவர் ராஜினாமா செய்ததாக தகவல்கள் தெரிவிக்கின்றன. இந்தத் தகவலை வெள்ளை மாளிகை திங்களன்று உறுதிப்படுத்தியது.
டிரிஸ்கால் ராஜினாமா செய்துவிட்டதாக வெளியான வால் ஸ்ட்ரீட் ஜர்னல் அறிக்கை குறித்துக் கேட்டபோது, வெள்ளை மாளிகையின் முதன்மைத் துணைப் பத்திரிகைச் செயலாளர் அன்னா கெல்லி அதை மறுக்கவில்லை. "அமெரிக்காவை மீண்டும் வலிமையாக்க வேண்டும் என்ற அதிபர் ட்ரம்பின் செயல்திட்டத்தை முன்னெடுத்துச் செல்வதில், டிரிஸ்கால் ராணுவத் துறைக்குள் மிகவும் செல்வாக்கு மிக்கப் பங்கை ஆற்றியுள்ளார்," என்று அவர் கூறினார்.
டிரிஸ்கால் இதற்கு முன்பு ராணுவத்தில் பணியாற்றி, 2007-ல் அதிகாரியானார். பின்னர், அவர் ஒரு குதிரைப்படைப் பிரிவுக்கு தலைமை தாங்கி, 2009-ல் பல மாதங்கள் ஈராக்கிற்கு பணியமர்த்தப்பட்டார். ராணுவச் செயலாளராக இருந்தபோது, போர்க்களத்தில் புதிய தொழில்நுட்பங்களை அவர் ஏற்றுக்கொண்டதன் காரணமாக, டிரிஸ்கால் 'ட்ரம்பின் ட்ரோன் நிபுணர்' என்று அறியப்பட்டார்.
கடந்த ஆண்டு, ரஷ்யா-உக்ரைன் போரை முடிவுக்குக் கொண்டுவருவதை நோக்கமாகக் கொண்ட பேச்சுவார்த்தைகளில் அவர் முக்கியப் பங்கு வகித்தார். அவர் வெளிநாடுகளுக்குப் பயணம் செய்து, உக்ரைன் அதிபர் வொலோடிமிர் ஜெலென்ஸ்கியை சந்தித்தார் என்பது குறிப்பிடத்தக்கது.
