அமெரிக்க அதிபர் ட்ரம்ப், தனது ட்ரூத் சோசியல் பக்கத்தில் வெளியிட்ட ஒரு பதிவில், "அமெரிக்கா தற்போது ஹார்முஸ் ஜலசந்திக்கு அருகில் உள்ள ஈரானிய இலக்குகளைத் தாக்கி வருகிறது. ஹார்முஸ் ஜலசந்தியில் கண்ணிவெடிகளை புதைக்க ஈரான் மேற்கொண்ட தோல்வியுற்ற முயற்சிக்கு பதிலடியாகவே இந்தத் தாக்குதல் நடத்தப்படுகிறது. அங்கு தற்போது கண்ணிவெடிகள் எதுவும் இல்லை; அவை முற்றிலுமாக அகற்றப்பட்டுவிட்டன. ஜோர்டானில் உள்ள நமது ராணுவத் தளத்தின் மீது 8 ஏவுகணைகளை வீசி தாக்கிய டெஹ்ரானின் தாக்குதல்களுக்கும் இது ஒரு பதிலடியாகும். ஈரான் மீண்டும் தாக்கினால், அதைவிடப் பெரும் சக்தியுடன் அது எதிர்கொள்ளப்படும்," என்று கூறியுள்ளார்.

 

அமெரிக்காவிற்கு விரைவில் பதிலளிக்கப்படும்: ஐ.ஆர்.ஜி.சி

மேலும், "ஈரான் மீதான மிகப்பெரிய தாக்குதல் இன்னும் வரவிருக்கிறது. அது ஈரானின் மிகச் சிறிய பகுதியையே பாதிப்பின்றி விட்டுவைக்காத ஒரு தாக்குதலாக இருக்கும்," என்று ட்ரம்ப் கூறியுள்ளார். இதைத் தொடர்ந்து, அமெரிக்க தாக்குதல்கள் குறித்து பேசிய ஈரானிய ராணுவமான ஐ.ஆர்.ஜி.சி-யின் செய்தித் தொடர்பாளர், இந்த சமீபத்திய தாக்குதல்களுக்கு அமெரிக்கா வருத்தம் அடையும் என்று கூறினார். தாக்குதல் நடத்தியவர்கள் கடுமையான தண்டனையை எதிர்கொள்வார்கள். இப்பகுதியில் தனது நடவடிக்கைகளுக்காக அமெரிக்க ராணுவம் பெரும் இழப்புகளை சந்திக்கும். விரைவில் ஒரு பதில் அளிக்கப்படும் என்று கூறியுள்ளார்.

அமெரிக்க மத்திய கட்டளைப் பிரிவின் தகவல்படி, அவர்கள் அமெரிக்க நேரப்படி மதியம் 12:00 மணிக்கு ஐ.ஆர்.ஜி.சி நிலைகளை தாக்கத் தொடங்கினர். ஈரானிய உள்ளூர் ஊடகங்களின்படி, கெஷ்ம், ஜஸ்க், சிரிக், சபாஹர், பந்தர் அப்பாஸ், கொனாரக் மற்றும் மினாப் போன்ற முக்கிய கடலோரப் பகுதிகளில் பலத்த வெடிப்புகள் நிகழ்ந்தன.

இரு தரப்பும் தற்போது தாக்குதல்களை தொடங்கியுள்ளதால், மத்திய கிழக்கில் மீண்டும் போர் பதற்றம் தொற்றிக்கொண்டுள்ளது.