சென்னை: குவாண்டம் ஆராய்ச்சியில் ஈடுபட்டுள்ள ஸ்டார்ட்-அப் நிறுவனங்களுக்கு இன்னும் 3 மாதங்களில் மானிய நிதி வழங்கப்படும் என தேசிய குவாண்டம் இயக்கத்தின் தலைவர் அஜய் சவுத்ரி கூறினார்.

குவாண்டம் கம்ப்யூட்டிங் தொடர்பான 5 நாள் சர்வதேச மாநாடு சென்னை தரமணியில் உள்ள ஐஐடி ஆராய்ச்சி பூங்கா வளாகத்தில் நேற்று தொடங்கியது. ஐஐடி குவாண்டம் தகவல் தொலைத்தொடர்பு மற்றும் கணினி மையம் ஏற்பாட்டில் நடைபெறும் இந்த மாநாட்டை தேசிய குவாண்டம் இயக்கத்தின் தலைவர் அஜய் சவுத்ரி தொடங்கிவைத்து பேசினார். அப்போது அவர் கூறியதாவது:

இந்த சர்வதேச மாநாடு முதல்முறையாக இந்தியாவில் நடத்தப்படுகிறது. இதற்காக பெருமுயற்சி எடுத்த ஐஐடி-க்கு பாராட்டுகள். மத்திய அறிவியல் மற்றும் தொழில்நுட்பத்துறையின் கீழ் தேசிய குவாண்டம் இயக்கம் செயல்படுகிறது.

மத்திய மின்னணு மற்றும் தகவல் தொழில்நுட்ப அமைச்சகம் உள்ளிட்ட பல்வேறு அமைச்சகங்களுடன் இணைந்து இந்தியாவில் குவாண்டம் கம்ப்யூட்டிங் துறையில் மேற்கொள்ளப்பட்டு வரும் ஆராய்ச்சி திட்டங்கள் தொடர்பான விவரங்களை கண்டறிந்தோம்.