Rishabh Pant and IPL 2025: BCCI लवकरच IPL 2025 साठी रिटेन्शन पॉलिसी जारी करण्याची शक्यता आहे. या रिटेन्शन पॉलिसीवर चाहते लक्ष ठेवून आहेत, कारण यानंतर संघ किती खेळाडूंना रिटेन करु शकणार याबाबत माहिती समोर येणार आहे. अशातच आता सोशल मीडियावर फेक न्यूजही पाहायला मिळत आहे. ऋषभ पंतबाबतही अशीच एक बातमी समोर आली होती, ज्याला या फलंदाजाने चोख प्रत्युत्तर दिले आहे. IPL 2025 मध्ये पंत RCBचे नेतृत्व करणार असल्याचे समोर आले होते, यावर पंतने भाष्य केले आहे.

आयपीएल 2025 च्या लिलावाआधी एक बातमी समोर आली आहे की, ऋषभ पंत रॉयल चॅलेंजर्स बंगळुरूशी म्हणजेच आरसीबीशी पुढील आयपीएल हंगामात खेळण्यासाठी संपर्क करत आहे. परंतु आरसीबी व्यवस्थापनाने त्याची विनंती स्वीकारली नाही. तसेच विराट कोहलीला पंत संघात नको आहे अशा आशयाची पोस्ट सोशल मीडियावर व्हायरल झाली होती. मात्र, काही वेळाने ऋषभ पंतने याला फेक न्यूज म्हटले आहे. तसेच त्याने आपल्या चाहत्यांना सोशल मीडियावर चुकीची माहिती पसरवू नका अशी विनंतीही केली आहे.

ऋषभ पंतचे चोख प्रत्युत्तर

RCB च्या संपर्कात असल्याच्या अफवेला उत्तर देताना ऋषभ पंतने म्हटले की, 'तुम्ही लोक सोशल मीडियावर एवढ्या खोट्या बातम्या का पसरवता? समजूतदार बना. विनाकारण असे वातावरण निर्माण करू नका. ही पहिली वेळ नाही आणि शेवटची वेळही नाही. कृपया तुमच्या स्त्रोतांचा अभ्यास करा, दिवसेंदिवस असे प्रकार वाढले आहेत. हे फक्त तुमच्यासाठी नाही, हे चुकीची माहिती पसरवणाऱ्या अनेक लोकांसाठी आहे.'

पंत फक्त दिल्ली कॅपिटल्सकडून खेळणार

ऋषभ पंत सध्या आयपीएलमध्ये दिल्ली कॅपिटल्सचा कर्णधार आहे आणि अलीकडेच पंत डीसीचा टॉप रिटेन्शन पर्याय बनण्यास तयार आहे अशी माहिती समोर आली आहे. पंत कारकीर्दीच्या पहिल्या सत्रापासून दिल्ली कॅपिटल्सकडून खेळत आहे. आधी तो खेळाडू म्हणून खेळत होता, पण आता तो कर्णधार आहे. पुढील हंगामातही तो त्याच संघाचा कर्णधार राहील, अशी अपेक्षा आहे. ऋषभ पंतची भारतीय संघात एंट्री आयपीएलमध्ये खेळल्यानंतरच झाली होती. आगामी काळात अशा अनेक खोट्या बातम्याही समोर येतील, पण त्यापासून सावध राहण्याची गरज आहे.