मुंबई : परदेशी गुंतवणूकदार मागील काही महिन्यांपासून भारतीय बाजारातून मोठ्या प्रमाणावर पैसे काढून घेत आहेत. यामुळे बाजारात मोठी घसरण झाली आहे. मात्र परदेशी गुंतवणूकदार काही शेअर्समध्ये गुंतवणूक करत आहेत. यापैकी एक शेअर्स म्हणजे शरणम इन्फ्राप्रोजेक्ट अँड ट्रेडिंग. या शेअर्समध्ये मॉरिशसमधील गुंतवणूकदार अल महा इन्व्हेस्टमेंट फंडने गुंतवणूक केली आहे. मॉरिशसमधील या परदेशी संस्थात्मक गुंतवणूकदाराने (FII) मंगळवारी करार करून शरणम इन्फ्राप्रोजेक्ट अँड ट्रेडिंगचे शेअर्स खरेदी केले. मंगळवार २५ फेब्रुवारी रोजी हा शेअर्स बीएसईवर १.१८ टक्क्यांनी वाढून ०.८६ रुपयांवर बंद झाला..मॉरिशसच्या अल महा इन्व्हेस्टमेंट फंड पीसीसी ओएनवायएक्स स्ट्रॅटेजीने शरणम इन्फ्राप्रोजेक्ट अँड ट्रेडिंगचे ९० लाख शेअर्स खरेदी केले आहेत. हा व्यवहार प्रति शेअर ०.८६ रुपये या किमतीने झाला. शरणम इन्फ्राप्रोजेक्ट बांधकाम आणि रिअल इस्टेट उद्योगांना बांधकाम साहित्य पुरवते.डिसेंबर तिमाही शरणम इन्फ्राप्रोजेक्ट अँड ट्रेडिंगसाठी ब्लॉकबस्टर ठरली आहे. चालू आर्थिक वर्ष २०२४-२५ च्या तिसऱ्या तिमाहीत (ऑक्टोबर-डिसेंबर २०२४) कंपनीचा निव्वळ नफा तिमाही आधारावर ५०० टक्क्यांनी वाढून १.०२ कोटी रुपये झाला. तर महसूल ३६०७ टक्क्यांनी वाढून १०.०१ कोटी रुपये झाला. गेल्या वर्षी २७ मे २०२४ रोजी शेअर्सची किंमत ०.४३ रुपये होती. ही शेअर्ससाठी एका वर्षातील सर्वात कमी पातळी आहे. या खालच्या पातळीवरून शेअर्सने फक्त ७ महिन्यांत १६० टक्क्यांहून अधिक उसळी घेऊन १ जानेवारी २०२५ रोजी १.१२ रुपयांची किंमत गाठली. ही शेअर्ससाठी एका वर्षातील विक्रमी उच्च पातळी आहे. कंपनीचे बाजार भांडवल ५१.०९ कोटी रुपये आहे.