वडगाव मावळ, ता. १७ : श्री शिवाजी रायगड स्मारक मंडळ संचालित लोहगड-विसापूर विकास मंच व ग्रामस्थांच्या वतीने लोहगड किल्ल्याच्या पायथ्याला असलेल्या शिवस्मारकावर शिवजयंती मोठ्या उत्साहात साजरी करण्यात आली.
शिवजयंतीनिमित्त मंचाच्या कार्यकर्त्यांनी फुलमाळा, रांगोळी व भगव्या पडद्यांनी शिवस्मारक सजावट केली होती. दीपोत्सवात हजारो दिव्यांच्या लखलखाटात शिवस्मारक उजळून निघाले होते. सहाय्यक पोलिस निरीक्षक प्रशांत आवारे यांच्या हस्ते दीप प्रज्वलन करून दीपोत्सवाला सुरुवात झाली. शिववंदनेने महाराजांना अभिवादन करण्यात आले. शिवघोषणांनी गड परिसर दुमदुमून गेला होता. गोल्डन ग्रुप तळेगाव दाभाडे यांच्या वतीने मंचाच्या शिवकार्यात लागणारी उंच शिडी सुपूर्द करण्यात आली. महाराष्ट्राच्या कानकोपऱ्यातून शिवभक्त शिवजयंतीच्या एक दिवस अगोदर लोहगडावरून शिवज्योत प्रज्वलित करून आपापल्या गावी घेऊन जाण्यासाठी मोठ्या संख्येने आले होते. सर्व शिवमंडळांनी शिवस्मारकावरून ज्योत प्रज्वलित करून महाराजांचा जयघोष केला. मंचाच्या वतीने आलेल्या शिवभक्तांचे जल्लोषात स्वागत करण्यात आले. या सर्वांची मंचाच्या वतीने चहापाण्याची व्यवस्था करण्यात आली होती. मंचाचे संस्थापक सचिन टेकवडे, अध्यक्ष विश्वास दौंडकर, अनिकेत आंबेकर, सागर कुंभार, संदीप गाडे, महेंद्र बैकर, सचिन निंबाळकर, सागर दळवी, अनिकेत इंगवले, सचिन कुंभार, अथर्व दळवी, अमोल गोरे, बसप्पा भंडारी, अजय मयेकर, चेतन नाटक, बाळकृष्ण बेल्हेकर, नीलेश भोसले, दत्ता घोडके आदी कार्यकर्त्यांनी संयोजन केले.