இந்தியாவுக்கும் பாகிஸ்தானுக்கும் இடையே நிலவும் பதற்ற சூழ்நிலையில், சமூக ஊடகங்களில் போலிச் செய்திகள் மற்றும் தவறான வீடியோக்கள் அதிக அளவில் பரவி வருகின்றன. பாகிஸ்தானின் பயங்கரவாத தாக்குதலுக்குப் பதிலளிக்கும் வகையில் இந்தியா தொடங்கிய ஆபரேஷன் சிந்தூர் நடவடிக்கைக்குப் பிறகு, வதந்திகள் மற்றும் பதற்றத்தை ஏற்படுத்தும் செய்திகள் இணையத்தில் பெருகியுள்ளன. இதை கட்டுப்படுத்தும் வகையில் மத்திய மின்னணு மற்றும் தகவல் தொழில்நுட்ப அமைச்சகம் (MeitY) புதிய இணைய வழிகாட்டுதல்களை வெளியிட்டுள்ளது.

பயனர்கள் செய்ய வேண்டியவை:

அதிகாரப்பூர்வ தகவல்களையும் ஹெல்ப்லைன் எண்களையும் மட்டும் பகிரவும்.

செய்திகள் உண்மையா என்பதை சரிபார்த்த பிறகே ஷேர் செய்யவும்.

போலிச் செய்திகள் இருப்பின் உடனடியாக புகார் செய்யவும்.

பயனர்கள் தவிர்க்க வேண்டியவை:

இந்திய ராணுவத்தின் இயக்கங்கள், நிலைகள், அல்லது புகைப்படங்களை சமூக ஊடகங்களில் பகிர வேண்டாம்.

சரிபார்க்கப்படாத செய்திகளை ஷேர் செய்ய வேண்டாம்.

தீவிரவாதம், மதவாதம், அல்லது வன்முறையை தூண்டும் வகை உள்ளடக்கங்களை தவிர்க்க வேண்டும்.

சமூக வலைதளங்களில் பொறுப்புடன் நடந்து கொள்ளுங்கள்

MeitY தனது எக்ஸ் தளத்தில், “தேசபக்தியுடன் இருங்கள், எச்சரிக்கையாக இருங்கள், பாதுகாப்பாக இருங்கள்” என பதிவு செய்து, அனைத்து இந்தியர்களும் சீராக நடந்து கொள்ள வேண்டுமென வலியுறுத்தியுள்ளது. தவறான தகவல்களை புகாரளிக்க வாட்ஸ்அப் எண் 8799711259 மற்றும் மின்னஞ்சல் socialmedia@pib.gov.in ஆகியவற்றை பகிர்ந்துள்ளது.

OTT தளங்களுக்கு அறிவுறுத்தல்

பாகிஸ்தானிய உள்ளடக்கங்கள் நீக்கப்பட வேண்டும்

அதே நேரத்தில், தகவல் மற்றும் ஒளிபரப்பு அமைச்சகம், இந்தியாவில் இயங்கும் அனைத்து OTT தளங்கள், மீடியா ஸ்ட்ரீமிங் சேவைகள், மற்றும் தொடர்புடைய நிறுவனங்களுக்கு கடுமையான ஆலோசனையை வழங்கியுள்ளது. பாகிஸ்தானிய வேருடைய திரைப்படங்கள், பாடல்கள், பாட்காஸ்ட்கள், வலைத் தொடர்கள் உள்ளிட்ட அனைத்தையும் உடனடியாக நீக்குமாறு அவ்வமைச்சகம் அறிவுறுத்தியுள்ளது. இது தேசிய பாதுகாப்பு மற்றும் நாட்டு ஒற்றுமைக்காக எடுக்கப்பட்ட கட்டுப்பாட்டு நடவடிக்கை என தெரிவிக்கப்பட்டுள்ளது.

இந்த நடவடிக்கைகள் அனைத்தும், இந்தியாவின் பாதுகாப்பையும் பொதுமக்களின் உணர்வுகளையும் பாதுகாக்கும் நோக்கத்துடன் மேற்கொள்ளப்பட்டதாக மத்திய அரசு தெரிவித்துள்ளது. வெறும் கிளிக் செய்வதற்கும் பகிர்வதற்கும் முன்னர் உண்மைதன்மையை உறுதி செய்யும் பொறுப்பு ஒவ்வொரு பயனருக்கும் உண்டு என்பதையே இந்த அறிவிப்புகள் வலியுறுத்துகின்றன.

The post appeared first on .