உடல் எடை இழப்பு மட்டுமின்றி, ஒட்டுமொத்த உடல் ஆரோக்கியத்தை மேம்படுத்தவும் நடைபயிற்சி உதவும். நடைபயிற்சியில் 6-6-6 என்ற முறை தற்போது டிரெண்ட் ஆகியுள்ளது. இதனுடைய நன்மைகள் குறித்து பார்ப்போம்.

தொடர்ந்து 6 வாரங்களுக்கு மேல், வாரத்துக்கு 6 நாட்கள், தினமும் காலை 6 மணி மற்றும் மாலை 6 மணிக்கு, 60 நிமிடங்கள் நடைப்பயிற்சியில் ஈடுபவதைத் தான் 6-6-6 நடைபயிற்சி முறை என்பர்.நடைபயிற்சியில் ஈடுபடும் முன் 6 நிமிடங்கள் வார்ம் அப்பில் ஈடுபடுவது, நடைபயிற்சிக்குப் பின் 6 நிமிடம் கூல் டவுன் செய்முறையில் ஈடுபட்டு உடலை ஓய்வெடுக்க விடுவர்.

இந்த உடற்பயிற்சி முறை உடல் மற்றும் மன நலனை மேம்படுத்துவதற்காக வடிவமைக்கப்பட்ட நடைபயிற்சி முறை ஆகும். 6-6-6 நடைப்பயிற்சி முறை உங்களின் வழக்கமான நடைப்பயிற்சியின் நன்மைகளை அதிகரிக்க உதவும் எளிதான மற்றும் வெற்றிகரமான அணுகுமுறை ஆகும்.

இதய நோய் அபாயத்தைக் குறைக்க : ஒரு நாளைக்கு குறைந்தது 30 நிமிடங்கள் வரை நடப்பது உங்களின் இதய நோய் அபாயத்தை 35 சதவீதம் வரைக் குறைப்பதாக ஆய்வுகளின் மூலம் தெரிய வந்துள்ளது.

காலை நேரத்தில் நடைப்பயிற்சியில் ஈடுபட்டு உடலை சுறுசுறுப்பாக வைத்திருப்பது இதய நோய்கள், பக்கவாதம் ஏற்படும் அபாயத்தைக் குறைக்கும் என ஆய்வாளர்கள் கூறுகின்றனர். மேலும், சீரான வேகத்தில் நடைப்பயிற்சியில் ஈடுபடுவது இதய ஆரோக்கியத்தை மேம்படுத்தவும், இரத்த அழுத்தத்தைக் குறைக்கவும் உதவும்.அதுமட்டுமின்றி, வளர்சிதை மாற்றத்தைத் தூண்டவும், சுத்தமான மற்றும் புதிய காற்றை சுவாசிக்கவும், இரத்த ஓட்டத்தை மேம்படுத்தவும் காலை நேரத்தில் நடைப்பயிற்சி மிகவும் சிறந்ததாகும். மேலும், உடலை உற்சாகப்படுத்தவும், புத்துணர்ச்சியாகவும் வைத்துக் கொள்ளவும், மனதின் தெளிவைத் தூண்டவும் நடைபயிற்சி உதவும்.

மன அழுத்தத்தைக் குறைக்க

மாலை நேரத்தில் நடைப்பயிற்சியில் ஈடுபடுவதன் மூலம் மனதை அமைதிப்படுத்த முடியும். இதன் மூலம் பரபரப்பான நாளுக்குப் பின் உடலின் ஏற்படும் மன அழுத்தத்தைப் போக்க மாலை நேர நடைப்பயிற்சி உதவும்.நடைப்பயிற்சியின் மூலம் உடலின் மகிழ்ச்சி ஹார்மோன்களான எண்டோர்பின்களை வெளியிடப்படும். இதன் மூலம் மன அழுத்தம், மனச் சோர்வு மற்றும் பதட்டத்தைக் குறைக்க முடியும். மேலும், இரவு நேர நல்ல தூக்கத்துக்கும் சுறுசுறுப்பான மாலை நேர நடைப்பயிற்சி மிகவும் பயனளிக்கும்.

உடல் எடையைப் பராமரிக்க

பொதுவாகவே நடைப்பயிற்சியில் ஈடுபடுவது உடல் எடையை சரியான அளவில் பராமரிக்க உதவும் எளிய முறையிலான உடற்பயிற்சி ஆகும். தொடர்ந்து நடப்பது உடலின் கலோரிகளையும், கொழுப்புகளையும் எரிக்கச் செய்யும்.இதன் மூலம் உடல் எடையை சரியாக நிர்வகிக்கவும், உடலின் அதிக கொழுப்புகளை எரிக்கவும், கொழுப்புகள் சேராமல் பராமரிக்கவும் 6-6-6 நடைப்பயிற்சி உதவும்.

எலும்புகளின் ஆரோக்கியத்தை அதிகரிக்க

தினமும் நடைப்பயிற்சியில் ஈடுபடுவது கால் தசைகளை வலுப்படுத்த உதவும்.மேலும், எலும்புகளின் ஆரோக்கியத்தை அதிகரிக்கவும், எலும்புகளின் அடர்த்தியை மேம்படுத்தவும், ஆஸ்டியோபோரோசிஸ் போன்ற பிரச்சனைகளின் காரணமாக ஏற்படும் எலும்பு முறிவுகளின் அபாயத்தைக் குறைக்கவும் 6-6-6 நடைப்பயிற்சி முறை உதவுகிறது.

மூட்டுகள் மற்றும் தசை வலிமையை அதிகரிக்க

நடைப்பயிற்சிக்கு முன்னும், பின்னும் வார்ம் அப் மற்றும் கூல் டவுன் செயல்முறைகளில் ஈடுபடுவது தசைகளை காயங்களிலிருந்து பாதுகாக்கவும், தசை வலிமையை அதிகரிக்கவும், மூட்டுகளின் நெகிழ்வுத்தன்மையை அதிகரிக்கவும், பராமரிக்கவும் உதவும்.
மற்ற நன்மைகள் : குறிப்பிட்ட நேர வரையறையில் நடைப்பயிற்சியில் ஈடுபடுவதன் மூலம் உங்களின் முழு உடலுக்கும் இரத்த ஓட்டம் மற்றும் ஆக்ஸிஜன் விநியோகம் ஊக்குவிக்கப்படும். மேலும், உடலின் ஆற்றலை அதிகரிக்கவும், சோம்பலைக் குறைத்து உங்களை சுறுசுறுப்பாக வைக்கவும் நடைப்பயிற்சி உதவும்.

6-6-6 நடைப்பயிற்சியின் போது மனதில் கொள்ள வேண்டிய குறிப்புகள்: 

6-6-6 நடைப்பயிற்சி முறை பாதுகாப்பானது தான் என்றாலும், இதனைத் துவங்கும் முன் சில விஷயங்களை கவனத்தில் எடுக்க வேண்டும். அவை என்னென்ன என்று பார்ப்போம்.

நடைப்பயிற்சியின் போது அதிலும் குறிப்பாக கோடை காலத்தில் நடைப்பயிற்சியில் ஈடுபடும்போது ஏற்படும் நீரிழப்பைத் தடுக்க, உடலை நீரேற்றமாக வைத்துக் கொள்வது மிகவும் அவசியமானது ஆகும்.

மேலும், நடைப்பயிற்சியின் போது பயன்படுத்தும் காலணிகள் சரியான அளவில், உங்களுக்கு வசதியான வகையில் இருக்குமாறு பார்த்துக் கொள்ள வேண்டும். பொருந்தாத காலணியை பயன்படுத்துவதால் காலில் வெடிப்பு, கொப்புளங்கள் அல்லது மூட்டு வலி ஏற்படும் வாய்ப்புகள் உள்ளன.
நடைப்பயிற்சி துவங்கும்போதே, வேகமாக நடக்க ஆரம்பிப்பதை தவிர்க்கவும். ஏனெனில், அதிக வேகத்தில் நடைப்பயிற்சியைத் துவங்குவது உடனடியான சோர்வுக்கு வழிவகுக்கும் என்பதை மறந்து விடாதீர்கள் நடைப்பயிற்சியின் வேகத்தை படிப்படியாக அதிகரிப்பது தான் அதனுடைய நன்மைகளை முழுமையாக பெற உதவும்.

நீங்கள் மூட்டு வலி, இதய நோய் போன்ற மருத்துவ நிலைமைகளால் பாதிக்கப்பட்டு இருந்தால், 6-6-6 நடைப்பயிற்சி முறையைத் துவங்கும் முன் மருத்துவரிடம் ஆலோசனை பெற்றுவிட்டு பின்னர் துவங்கவும். ஏனெனில், சில நேரங்களில் இதுபோன்ற மருத்துவ நிலைமைகள் உடற்பயிற்சிகளில் ஈடுபடுவதால் மோசமடையும் வாய்ப்புகள் உள்ளன.