मिंधे गटाचे डहाणू विधानसभा समन्वयक आणि माथाडी सेनेचे तालुका अध्यक्ष अशोक रमण धोडी यांच्या निर्घृण हत्येप्रकरणी तब्बल सहा महिन्यांनंतर मुख्य आरोपी अविनाश धोडीला अखेर पालघर स्थानिक गुन्हे शाखेने अटक केली आहे. या प्रकरणाने पालघर जिल्ह्यात खळबळ उडवून दिली होती. न्यायालयाने वॉरंट काढूनही पोलिसांच्या ताब्याबाहेर राहिलेल्या या आरोपीला पकडण्यात यतीश देशमुख यांच्या नेतृत्वाखालील नवीन पोलीस प्रशासनाला मोठे यश मिळाले आहे. आरोपी अविनाश धोडी हा अशोक धोडी यांचा सख्खा भाऊ असून तो दारू माफिया म्हणून कुख्यात आहे.

20 जानेवारी 2025 रोजी अशोक धोडी मुंबईहून डहाणूच्या दिशेने निघाले होते, पण रात्री घरी परतलेच नाहीत. त्यानंतर कुटुंबीयांनी त्यांच्या अपहरणाचा आणि घातपाताचा संशय व्यक्त केला. तपासाच्या सुरुवातीलाच संशयाची सुई अशोक धोडी यांचा सख्खा भाऊ अविनाश धोडीकडे वळली. मात्र चौकशीसाठी बोलावल्यावर तो पोलिसांच्या चौकीतून पळून गेला होता.

काय आहे प्रकरण?

मिंधे गटाचे पदाधिकारी अशोक धोडी हे कामानिमित्त डहाणू येथे कार ठेवून ट्रेनने मुंबईला गेले होते. 20 जानेवारी रोजी सोमवारी संध्याकाळी डहाणू रेल्वे स्थानकात उतरून बोर्डी-बोरीगावमार्गे वेवजी येथे घरी येण्यासाठी निघाले. मात्र ते घरी पोहोचलेच नाहीत. तेव्हापासून अशोक धोडी आणि त्यांची कार बेपत्ता होती. पोलिसांनी आठ दिवसांनंतर अपहरणाचा गुन्हा नोंद केला. दरम्यान, 31 जानेवारीला गुजरातमधील सरीगाम येथील बंद खाणीत गाडीच्या डिकीत धोडी यांचा मृतदेह सडलेल्या अवस्थेत आढळून आला. यानंतर तपासाची चक्रे फिरवत पोलिसांनी चार आरोपींना अटक केली. तर या प्रकरणातील मुख्य आरोपी अविनाश धोडी वेवजी येथील पोलीस चौकीतून फरार झाला होता. आता त्याला बेड्या ठोकण्यात आल्या आहेत.