செயற்கை நுண்ணறிவு தொழில்நுட்பம், ஒரு அணு ஆயுத போரை தொடங்கி வைத்துவிடுமோ என்று நிபுணர்கள் பயப்படுகிறார்கள்.

அணு ஆயுதங்களை ஆராயும் உலகின் முன்னணி அமைப்பான ஸ்டாக்ஹோம் சர்வதேச அமைதி ஆராய்ச்சி நிறுவனம், AI போன்ற தொழில்நுட்பங்கள் போர் அபாயத்தை இன்னும் கூட்டுகின்றன என்று கூறியுள்ளது.

உதாரணமாக, ஒரே வருடத்தில் சீனாவின் அணு ஆயுத கையிருப்பு 500-லிருந்து 600 ஆக வேகமாக அதிகரித்திருக்கிறது. அதே சமயம், அணு ஆயுத நாடான அமெரிக்காவுக்கும் ரஷ்யாவுக்கும் இடையேயான முக்கிய ஆயுத கட்டுப்பாடு ஒப்பந்தம் விரைவில் முடிவுக்கு வரப்போகிறது என்பதையும் சர்வதேச அமைதி ஆராய்ச்சி நிறுவனம் சுட்டிக்காட்டியுள்ளது.

இந்த அமைப்பின் இயக்குனர் டான் ஸ்மித் எச்சரிப்பது என்னவென்றால், “வரப்போகும் ஆயுத போட்டியின் ஒரு பகுதியாக, தாக்குதல் மற்றும் தற்காப்புக்காக செயற்கை நுண்ணறிவு துறையில் ஒரு படி மேலே இருப்பதற்கும், அந்த நிலையை தக்க வைத்துக்கொள்வதற்கும் உலக நாடுகள் முயற்சிக்கும். இதில் சில நல்ல விஷயங்கள் இருக்கலாம். ஆனால், AI-ஐ கவனக்குறைவாக பயன்படுத்தினால், அணுசக்தி அபாயம் கணிசமாக அதிகரிக்கும்.” என்று எச்சரித்துள்ளார்.

அணுசக்தி ஒப்பந்தங்களை நாடுகள் சரியாக கடைப்பிடிக்கிறதா என்று AI மூலம் எளிதாக கண்டறிய முடியும் என்றாலும், நெருக்கடியான சூழ்நிலைகளில் உலக நாடுகள் மற்றும் தீவிரவாத குழுக்கள் அவசரப்பட்டு, சரியாக யோசிக்காமல் முடிவுகளை எடுக்கவும் AI வழிவகுக்கும் என்று அவர் தெரிவித்தார்.

“ஒரு புதிய அணு ஆயுத போட்டி தொடங்கப் போவதற்கான அறிகுறிகள் தென்படுகின்றன. கடந்த முறை நடந்ததை ஒப்பிடும்போது, இம்முறை அபாயங்கள் மிகவும் வித்தியாசமாகவும், தீவிரமாகவும் இருக்கும்.”

தற்போது, ஒன்பது நாடுகளில் அணு ஆயுதங்கள் உள்ளன. பிரிட்டன், பிரான்ஸ், அமெரிக்கா, ரஷ்யா, மற்றும் சீனா ஆகிய ஐந்து நாடுகள் அணு ஆயுதப் பரவல் தடை ஒப்பந்தத்தில் கையெழுத்திட்டுள்ளன. ஆனால், இந்தியாவும் பாகிஸ்தானும் அதில் கையெழுத்திடவில்லை.

வடகொரியா இந்த ஒப்பந்தத்தில் கையெழுத்திட்டிருந்தது. ஆனால், தனது முதல் அணு ஆயுத சோதனையைச் செய்வதற்கு சற்று முன்பு, அதில் இருந்து விலகி விட்டது.

இஸ்ரேல் அணு ஆயுத பரவல் தடை ஒப்பந்தத்தில் கையெழுத்திடவும் இல்லை, தன்வசம் அணு ஆயுதங்கள் இருப்பதையும் ஒருபோதும் பொதுவில் அறிவிக்கவில்லை. ஆனால், அந்நாட்டிடம் 90 அணு ஆயுதங்கள் இருப்பதாக நம்பப்படுகிறது.

தற்போது, இஸ்ரேல் ஈரானுடன் சண்டையிட்டு கொண்டிருக்கிறது. ஈரான் அணு குண்டுகளை தயாரிக்கத் தேவையான தொழில்நுட்பத்தை உருவாக்கி வருவதாக குற்றம் சாட்டப்பட்டுள்ளது.

அமெரிக்க அதிபர் டொனால்ட் டிரம்ப், ஈரான் அரசு அணு ஆயுத மேம்பாட்டை கட்டுப்படுத்தும் ஒப்பந்தத்தை ஏற்க மறுத்ததை காரணம் காட்டி, ஈரானியர்களை தெஹ்ரானை காலி செய்யுமாறு வலியுறுத்தினார். இஸ்ரேலும் ஈரானும் தொடர்ந்து ஐந்தாவது நாளாக ஒருவரையொருவர் தாக்கிக்கொண்டன.

இந்த தகவலுக்கு ஆவதும் AIயால்.. அழிவதும் AIயால் என நெட்டிசன்கள் கமெண்ட் பதிவு செய்து வருகின்றனர்.