ராஜஸ்தான் மாநிலத்தின் பாலி மாவட்டத்தில் உள்ள பெடா ரோட்டேலா பகுதியில், ஜவாய் சிறுத்தை சரணாலய எல்லையில் நடந்த உணர்ச்சி பூர்வமான சம்பவம் தற்போது சமூக வலைதளங்களில் வைரலாகி வருகிறது. பசு ஒன்று, தனது கன்றைக் காப்பாற்ற ஒரு கொடூரமான சிறுத்தையை எதிர்கொண்டு விரட்டி அடித்த வீடியோ சமூக வலைதளங்களில் நெட்டிசன்களை ஆச்சர்யத்தில் ஆழ்த்தியுள்ளது.

12 வினாடிகள் கொண்ட அந்த வீடியோவில், ஒரு சிறுத்தை பசுவின் கன்றைக் கூர்மையான பற்களால் கழுத்தைப் பிடித்து இழுக்கும் காட்சி தென்படுகிறது. அப்பொழுது தாய் பசு, தன்னுடைய உயிரை பற்றிய பயமின்றி, கன்றைப் பாதுகாக்க சிறுத்தையை நோக்கி முழு வேகத்தில் ஓடுகிறது.

திடீரென எதிர்பாராத தாக்குதலுக்கு ஆளான சிறுத்தை அங்கிருந்து ஓடிச்செல்கிறது. இந்த வீடியோ @AvPakad என்ற பயனர் X தளத்தில் (முந்தைய ட்விட்டர்) பதிவிட்ட பிறகு, நூற்றுக்கணக்கான பேர் பகிர்ந்து, பசுவின் தைரியத்தை பாராட்டியுள்ளனர்.