கரூரில் கடந்த மாதம் இறுதியில் நடைபெற்ற தேர்தல் பிரசாரத்தில் ஏற்பட்ட கூட்ட நெரிசல் தமிழகம் முழுவதும் பெரும் அதிர்ச்சியை ஏற்படுத்தியது. அப்போது தமிழக வெற்றிக் கழகம் கட்சித் தலைவர் விஜய் கலந்து கொண்ட கூட்டத்தில் திடீரென நெரிசல் ஏற்பட்டது. அதில் 41 பேர் பரிதாபமாக உயிரிழந்தனர். இந்த சம்பவம் தமிழகத்தை உலுக்கியது.

இந்த கூட்டத்தில் விஜய் தாமதமாக வந்ததுதான் நெரிசலுக்கு காரணம் என அரசு தரப்பில் கூறப்படுகிறது. ஆனால், த.வெ.க. சார்பில் “எங்களுக்குக் கேட்ட இடம் வழங்கப்படவில்லை; போதுமான பாதுகாப்பு ஏற்பாடுகள் செய்யப்படவில்லை” என்று எதிர்க்கட்சிகளும் கடும் விமர்சனங்களை முன்வைத்துள்ளன. இந்நிலையில், கூட்ட நெரிசல் மரண விபத்து தொடர்பாக உச்சநீதிமன்றம் தலையிட்டு, வழக்கை மத்திய புலனாய்வு அமைப்பு (CBI)க்கு மாற்றி விசாரிக்க உத்தரவிட்டது.

இதே நேரத்தில், கரூர் கூட்ட நெரிசல் சம்பவத்தை சுட்டிக்காட்டி, “தமிழக வெற்றிக் கழகத்தின் கட்சி அங்கீகாரம் ரத்து செய்யப்பட வேண்டும்” என வழக்கறிஞர் ஒருவர் உயர்நீதிமன்றத்தில் மனுத் தாக்கல் செய்திருந்தார். அந்த மனு விசாரணையின் போது, இந்திய தேர்தல் ஆணையம் பதிலளித்துள்ளது. அதில், “தமிழக வெற்றிக் கழகம் அங்கீகரிக்கப்பட்ட அரசியல் கட்சி அல்ல” என தெளிவுபடுத்தியுள்ளது.

இந்த அறிவிப்பு வெளிவந்ததுடன், அரசியல் வட்டாரத்தில் பரபரப்பு ஏற்பட்டுள்ளது. ஒரு புறம் த.வெ.க. ஆதரவாளர்கள் இதை அரசியல் வேட்டையாடல் எனக் குற்றம் சாட்டுகின்றனர். மறுபுறம் எதிர்க்கட்சிகள் “அங்கீகாரம் இல்லாத கட்சி மாநிலம் முழுவதும் பெரிய அளவில் கூட்டம் நடத்துவது எப்படி?” என கேள்வி எழுப்பியுள்ளனர். இதனால், கரூர் கூட்ட நெரிசல் வழக்கு தற்போது புதிய திருப்பத்தை எடுத்துள்ளது.