சி.பி.சி.ஐ.டி., போலீஸ் அதிகாரிகளுக்கு உதவி செய்ய, காஞ்சிபுரம், மதுரை, நெல்லை, திருச்சி மற்றும் சேலம் அலுவலகத்தில் புதிதாக சட்ட ஆலோசகர் பணியிடம் உருவாக்கப்பட்டுள்ளது.
காவல்துறையின் நிர்வாகத்தை மேம்படுத்தும் நோக்கில், பல்வேறு பிரிவுகளில் ஆறு புதிய உயர் பணியிடங்கள் உருவாக்கப்பட்டுள்ளன.
காவலர் வீட்டுவசதி கழகத்தில் முதன்மை நிர்வாக அதிகாரி பணியிடம் மற்றும் சென்னை மாநகரக் காவல் துறையில் நிதி கட்டுப்பாட்டாளர் பணியிடம் புதிதாக உருவாக்கப்பட்டுள்ளன. அத்துடன், காவலர் நலன் மற்றும் எஸ்டேட் என்ற புதிய பணியிடமும் சேர்க்கப்பட்டுள்ளது.
பொருளாதார குற்றப்பிரிவில், மேற்கு மண்டல எஸ்.பி. பணியிடமும், திட்டமிட்ட குற்றத் தடுப்பு நுண்ணறிவுப் பிரிவில் ஒரு எஸ்.பி. பணியிடமும் புதிதாக சேர்க்கப்பட்டுள்ளன.
முன்னதாக சி.பி.சி.ஐ.டி. பிரிவில் இருந்த எஸ்.பி. பணியிடங்களான 'எஸ்.பி. ஒன்று, இரண்டு, மூன்று' என்ற பழைய நடைமுறை மாற்றப்பட்டுள்ளது.இப்பொழுது அவை வடக்கு, தெற்கு, மத்திய மண்டல எஸ்.பி.க்கள் எனப் பெயர் மாற்றம் செய்யப்பட்டுள்ளன.
இந்த மண்டல எஸ்.பி.க்களுக்கான எல்லைகளும் தெளிவாக வகுக்கப்பட்டு, செயல்பாடு எளிமைப்படுத்தப்பட்டுள்ளதாக காவல்துறை அதிகாரிகள் தெரிவித்தனர்.
