புத்தாண்டு என்பது காலண்டர் மாறுவது மட்டுமல்ல; பொதுமக்களின் அன்றாட வாழ்க்கையிலும் பல மாற்றங்களை கொண்டு வருவதாகும். அந்த வகையில், 2025 முடிந்து 2026 தொடங்கும் நிலையில், வங்கி சேவைகள், வரி விதிகள், ரேஷன் கார்டு, எரிபொருள் விலை உள்ளிட்ட பல துறைகளில் புதிய விதிகள் அமலுக்கு வரவுள்ளதாக எதிர்பார்க்கப்படுகிறது. இவை பொதுமக்களின் செலவு, சேமிப்பு மற்றும் எதிர்காலத் திட்டங்களை நேரடியாக பாதிக்கக்கூடியவை.

ரேஷன் கார்டு

2026 முதல் ரேஷன் கார்டு தொடர்பான விதிகளில் மாற்றம் செய்யப்பட உள்ளது. ரேஷன் கார்டுக்கு ஆன்லைன் விண்ணப்பிக்கும் முறை எளிமைப்படுத்தப்பட்டுள்ளதாக தெரிவிக்கப்படுகிறது. இதனால், கிராமப்புற மக்கள் மற்றும் விவசாயிகள் இனி அரசு அலுவலகங்களுக்கு அடிக்கடி செல்லாமல், வீட்டிலிருந்தே விண்ணப்பிக்க முடியும். இதன் மூலம் நேரமும் செலவும் சேமிக்கப்படும் என அதிகாரிகள் தெரிவிக்கின்றனர்.

விவசாயிகளுக்கான புதிய நிபந்தனைகள்

விவசாயிகளுக்கான திட்டங்களிலும் முக்கிய மாற்றங்கள் அமலுக்கு வரவுள்ளன. பல மாநிலங்களில் விவசாயி அடையாள அட்டை கட்டாயமாக்கப்படலாம். இந்த அடையாள அட்டை இல்லாதவர்களுக்கு, பிரதமர் கிசான் சம்மான் நிதி திட்டத்தின் கீழ் வழங்கப்படும் தொகை தற்காலிகமாக நிறுத்தப்பட வாய்ப்பு உள்ளதாக கூறப்படுகிறது. மேலும், 2026 காரீஃப் பருவத்திலிருந்து பயிர்க் காப்பீட்டுத் திட்டத்தில் வனவிலங்குகள் ஏற்படுத்தும் சேதமும் சேர்க்கப்பட உள்ளது.

வங்கி, வருமான வரி விதிகள்

2026-ல் வங்கி மற்றும் வருமான வரி விதிகளிலும் மாற்றங்கள் எதிர்பார்க்கப்படுகின்றன. வருமான வரி ரிட்டன் படிவங்கள் மேலும் விரிவாக்கப்படலாம். அதேபோல், கிரெடிட் ஸ்கோர் புதுப்பிப்பு விதி மாற்றப்பட்டு, இனி 7 நாட்களுக்குள் ஸ்கோர் அப்டேட் செய்யப்படும் என தெரிவிக்கப்படுகிறது. இதன் மூலம் கடன் பெறுவது சற்றே எளிதாகும்.

கல்வித் துறையில் டிஜிட்டல் முறை

அரசுப் பள்ளிகளில் டிஜிட்டல் நடைமுறைகள் அதிகரிக்கப்பட உள்ளன. பல மாநிலங்களில், ஆசிரியர்களின் வருகையை கண்காணிக்க டேப்லெட் மூலம் டிஜிட்டல் அட்டெண்டன்ஸ் முறை 2026 முதல் அமல்படுத்தப்பட உள்ளது. இது கல்வித் துறையில் வெளிப்படைத்தன்மையை அதிகரிக்கும் என கூறப்படுகிறது.

சமூக ஊடகங்களுக்கு கட்டுப்பாடுகள்

சமூக ஊடகப் பயன்பாட்டிலும் புதிய கட்டுப்பாடுகள் வரக்கூடும். 16 வயதுக்குட்பட்ட குழந்தைகளின் சமூக ஊடகப் பயன்பாட்டை கட்டுப்படுத்தும் விதிகள் எதிர்காலத்தில் அமல்படுத்தப்படலாம். குழந்தைகளின் பாதுகாப்பை கருத்தில் கொண்டு இந்த நடவடிக்கை மேற்கொள்ளப்படுவதாக தெரிவிக்கப்படுகிறது.

எரிபொருள் விலைகள்

எரிபொருள் மற்றும் எரிவாயு விலைகளிலும் மாற்றம் இருக்கலாம். ஜனவரி 1, 2026 முதல் எல்பிஜி சிலிண்டர் விலை குறைய வாய்ப்புள்ளதாக எதிர்பார்க்கப்படுகிறது. மேலும், வரி மாற்றங்கள் காரணமாக சிஎன்ஜி மற்றும் பிஎன்ஜி விலைகளும் குறையக்கூடும். இது குடும்பங்களுக்கும் வாகன உரிமையாளர்களுக்கும் ஓரளவு நிம்மதியை அளிக்கும் என கணிக்கப்படுகிறது.

அரசு ஊழியர்களுக்கு நன்மை

அரசு ஊழியர்களுக்கான எட்டாவது ஊதியக் குழு தொடர்பான அறிவிப்புகள் 2026-ல் வெளியாகலாம். இதனால் அடிப்படை சம்பளம் மற்றும் ஓய்வூதியத்தில் உயர்வு ஏற்படும் வாய்ப்பு உள்ளது.

பான் – ஆதார் இணைப்பு

பான் கார்டு மற்றும் ஆதார் இணைப்பு கட்டாயமாக்கப்பட உள்ள நிலையில், ஜனவரி 1, 2026க்கு முன் இதை செய்யாவிட்டால் நிதி பரிவர்த்தனைகளில் சிக்கல் ஏற்படும் என எச்சரிக்கப்படுகிறது.
முன்னெச்சரிக்கை அவசியம் மொத்தத்தில், 2026 புத்தாண்டு பல விதி மாற்றங்களுடன் தொடங்கவுள்ளதால், விவசாயிகள், அரசு மற்றும் தனியார் ஊழியர்கள், ஓய்வூதியதாரர்கள், நடுத்தர குடும்பங்கள் உள்ளிட்ட அனைவரும் முன்கூட்டியே விழிப்புடன் இருந்து, தேவையான நடவடிக்கைகளை எடுக்க வேண்டியது அவசியம் என அதிகாரிகள் அறிவுறுத்துகின்றனர்.