தமிழக அரசியலில் பெரும் மாற்றமாக, திமுக மற்றும் அதிமுகவில் அதிருப்தியில் உள்ள முக்கிய நிர்வாகிகளைத் தனது ‘தமிழக வெற்றி கழகத்தில்’ (தவெக) இணைக்கும் பணிகளை விஜய் தீவிரப்படுத்தியுள்ளார். ஏற்கனவே அதிமுக முன்னாள் அமைச்சர் செங்கோட்டையன், நாஞ்சில் சம்பத் போன்றோர் இணைந்ததைத் தொடர்ந்து, தற்போது செங்கோட்டையன் மூலமாக எடப்பாடி பழனிசாமிக்கு நெருக்கமான மேலும் 10 முன்னாள் அமைச்சர்களிடம் பேச்சுவார்த்தை நடத்தப்பட்டு வருகிறது.

குறிப்பாக அதிமுக முன்னாள் எம்.எல்.ஏ பெரியசாமி, கு.ப.கிருஷ்ணன் போன்றோர் விரைவில் இணைய உள்ளதாகவும், ஓ.பன்னீர்செல்வத்தின் ஆதரவாளர்களான வைத்திலிங்கம் மற்றும் மனோஜ் பாண்டியன் ஆகியோரும் தவெக பக்கம் வர வாய்ப்புள்ளதாகவும் கூறப்படுகிறது.

அதிமுக மட்டுமல்லாது, திமுகவில் உள்ள அதிருப்தி நிர்வாகிகளையும் தவெக குறிவைத்துள்ளது. தஞ்சாவூர் மற்றும் ஒட்டன்சத்திரம் பகுதிகளைச் சேர்ந்த திமுக நிர்வாகிகள் பலர் ஏற்கனவே தவெகவில் இணைய முடிவெடுத்துள்ளனர்.

புதுச்சேரி முன்னாள் ஐஜி ராமச்சந்திரன் மற்றும் திருப்பரங்குன்றம் திமுக முன்னாள் செயலாளர் கார்த்திகேயன் ஆகியோர் ஏற்கனவே தவெகவில் இணைந்துள்ளனர். இவ்வாறு முக்கிய கட்சிகளில் இருந்து அனுபவம் வாய்ந்த தலைவர்களை இழுப்பதன் மூலம், வரும் சட்டமன்றத் தேர்தலில் தமிழகம் முழுவதும் தவெகவைப் பலமான கட்சியாக மாற்ற விஜய் திட்டமிட்டு வருகிறார்.