டி20 உலகக்கோப்பைத் தொடரின் சூப்பர்-8 சுற்றில் மேற்கிந்தியத் தீவுகளுக்கு எதிரான இக்கட்டான போட்டியில், சஞ்சு சாம்சனின் பொறுப்பான ஆட்டத்தால் இந்திய அணி 5 விக்கெட் வித்தியாசத்தில் வெற்றி பெற்று அரையிறுதிக்குத் தகுதி பெற்றுள்ளது. அணியிலிருந்து நீக்கப்பட்டிருந்த சாம்சன், மீண்டும் வாய்ப்பு கிடைத்தவுடன் தனது திறமையை நிரூபித்துள்ளார்.

சாம்சனின் இந்த ஆட்டத்திற்குப் பல தரப்பிலிருந்தும் பாராட்டுகள் குவிந்து வருகின்றன. பாகிஸ்தான் முன்னாள் கேப்டன் முகமது ஹாஃபீஸ், சாம்சனை வெகுவாகப் பாராட்டியுள்ளார். “சஞ்சு தனிப்பட்ட சாதனைகளுக்காக விளையாடுவதில்லை; அணியின் தேவைக்கேற்ப விளையாடுகிறார். சதமடிக்க வேண்டும் என்ற எண்ணமின்றி, வெற்றிக்காக மட்டுமே அவர் விளையாடுவது அவரை மற்ற வீரர்களிடமிருந்து வேறுபடுத்திக் காட்டுகிறது,” என்று ஹாஃபீஸ் தெரிவித்துள்ளார்.

இந்திய முன்னாள் வேகப்பந்து வீச்சாளர் இர்ஃபான் பதான் கூறுகையில், “12 முதல் 19-வது ஓவர் வரை சஞ்சு பந்தை காற்றில் அடிக்காமல், எந்த ரிஸ்க்கும் எடுக்காமல் பவுண்டரிகளை விளாசினார். சரியான முறையில் இலக்கை விரட்டுவது எப்படி என்பதை அவர் ‘மாஸ்டர் கிளாஸ்’ ஆட்டம் மூலம் நிரூபித்துள்ளார்,” என்றார்.

இந்த ஆட்டத்தில் மேற்கிந்தியத் தீவுகள் நிர்ணயித்த இலக்கை விரட்டிய இந்தியாவுக்கு ஆரம்பத்திலேயே விக்கெட்டுகள் விழுந்தன. சஞ்சு சாம்சன் (97) மற்றும் திலக் வர்மா (27) ஆகியோரைத் தவிர மற்ற இந்திய வீரர்கள் 20 ரன்களைக் கூட எட்டவில்லை என்பது சாம்சனின் ஆட்டத்தின் முக்கியத்துவத்தை உணர்த்துகிறது.