வீட்டில் சிலந்திகள் நேரடி பாதிப்பை ஏற்படுத்தாதவையாக இருந்தாலும், அவற்றின் வலைகள் மற்றும் இருப்பு பலருக்கு சங்கடத்தை உண்டாக்குகிறது. குறிப்பாக மழைக்காலத்தில் ஈக்கள், கொசுக்கள், கரப்பான் பூச்சிகள் அதிகரிக்கும் போது, அவற்றை வேட்டையாட சிலந்திகளும் வீடுகளுக்குள் புகுந்துவிடுகின்றன.

எனவே அவற்றை அழிப்பதை விட, இயற்கையான முறையில் வீட்டிலிருந்து விலக்குவது சிறந்த தீர்வாக பார்க்கப்படுகிறது.இதற்கு அத்தியாவசிய எண்ணெய்கள் மிகவும் பயனுள்ளதாக இருக்கின்றன. குறிப்பாக மிளகுக்கீரை (peppermint) எண்ணெயின் திடமான மணம் சிலந்திகளை விரட்டும். இதை தண்ணீருடன் கலந்து, வீட்டு மூலைகள், ஜன்னல் ஓரங்கள் மற்றும் கதவுகள் அருகே தெளித்தால் நல்ல பலன் கிடைக்கும்.

அதேபோல் தேயிலை மர எண்ணெய், லாவெண்டர், இலவங்கப்பட்டை போன்றவற்றையும் மாற்றி மாற்றி பயன்படுத்தலாம்.வினிகரும் (vinegar) ஒரு சக்திவாய்ந்த இயற்கை விரட்டியாக செயல்படுகிறது. அரை பங்கு வினிகர், அரை பங்கு தண்ணீர் கலந்து ஸ்ப்ரே செய்து, சுவர்கள், இருண்ட மூலைகள் மற்றும் வலை கட்டும் இடங்களில் தெளித்தால் சிலந்திகள் அருகில் வராமல் இருக்கும்.

ஆனால் மரச்சாமான்கள் மீது பயன்படுத்தும் போது சிறிது கவனம் தேவை.வீட்டை சுத்தமாக வைத்திருப்பது மிக முக்கியமான அடிப்படை வழிமுறை. தூசி படிந்த இடங்கள், அமைதியான மூலைகள் போன்றவை சிலந்திகளின் பிடித்த இடங்கள். எனவே அடிக்கடி சுத்தம் செய்தல், பொருட்களை ஒழுங்காக வைத்தல், மேல்மாடி மூலைகள் மற்றும் பழைய பெட்டிகளை சுத்தம் செய்தல் ஆகியவை அவற்றின் இருப்பை குறைக்கும்.

இயற்கை தாவரங்களும் இதில் உதவுகின்றன. யூகலிப்டஸ், எலுமிச்சை, ஆரஞ்சு போன்ற செடிகளின் மணம் சிலந்திகளுக்கு விருப்பமல்ல. இத்தகைய செடிகளை வீட்டின் சுற்றுப்புறத்தில் வளர்ப்பது இயற்கையான பாதுகாப்பை வழங்கும்.மேலும், வெளிப்புற விளக்குகளை கட்டுப்படுத்துவது அவசியம்.

அதிக வெளிச்சம் பூச்சிகளை ஈர்க்கும்; பூச்சிகள் வந்தால் சிலந்திகளும் வரும். எனவே தேவையற்ற விளக்குகளை இரவில் அணைப்பது நல்லது.பூண்டு, கிராம்பு போன்றவற்றின் மணமும் சிலந்திகளை விரட்ட உதவும். பூண்டு சாறு தண்ணீரில் கலந்து தெளிப்பதோ, புதினா மற்றும் கிராம்பு கலவையை பயன்படுத்துவதோ சிறந்த வழிமுறையாகும்.

இதனுடன், ஜன்னல் மற்றும் கதவுகளில் நெட்டுகள் பொருத்துதல், சுவர்களில் உள்ள பிளவுகளை மூடுதல், குப்பைகளை அகற்றுதல் போன்ற முன்னெச்சரிக்கை நடவடிக்கைகளும் அவசியம். இவ்வாறு எளிய இயற்கை முறைகளை பின்பற்றினால், சிலந்திகளின் தொல்லையை குறைத்து வீட்டை சுத்தமாகவும் சுகாதாரமாகவும் பராமரிக்க முடியும்.