அதிமுக பொதுச்செயலாளர் எடப்பாடி பழனிசாமி தென் மாவட்டங்களில் தீவிர பிரசாரத்தில் ஈடுபட்டு வருகிறார். கட்சியின் வேட்பாளர்களுக்கு ஆதரவாக அவர் மேற்கொண்ட சுற்றுப்பயணம், தேர்தல் சூழலை மேலும் உற்சாகப்படுத்தி வருகிறது. அந்த வகையில், நேற்று கன்னியாகுமரி மாவட்டத்தில் நடைபெற்ற அவரது பிரசாரம் கவனம் ஈர்த்தது.
மேலும், பிரசாரம் நடந்து கொண்டிருந்த வேளையில், தேர்தல் பறக்கும் படை அதிகாரிகள் திடீரென எடப்பாடி பழனிசாமி பயணித்த பிரசார வேனை நிறுத்தி சோதனை மேற்கொண்டனர். வாகனத்தில் பணம் அல்லது பரிசுப் பொருட்கள் உள்ளனவா என்பதை உறுதி செய்ய, பெட்டிகள், பைகள் என எதையும் தவறவிடாமல் அங்குலம் அங்குலமாக ஆய்வு செய்தனர்.
இந்த சோதனை தீவிரமடைந்தபோது, வாகனத்தின் பேட்டரி பகுதியையும் திறந்து காட்டுமாறு அதிகாரிகள் உத்தரவிட்டனர். இதனால் ஒரு கணம் தயக்கம் ஏற்பட்டபோதிலும், “சட்டம் மேலோங்கி நிற்க வேண்டும்” என்ற அணுகுமுறையுடன் எடப்பாடி பழனிசாமி, பேட்டரி பெட்டியையும் திறந்து காட்டும்படி பாதுகாவலருக்கு நேரடியாக அறிவுறுத்தினார்.
இதனைத் தொடர்ந்து, அந்த பகுதியும் முழுமையாக ஆய்வு செய்யப்பட்டது. சில நிமிடங்கள் நீடித்த இந்த விரிவான சோதனையில் எந்த விதமான பணமோ, பரிசுப் பொருட்களோ கண்டுபிடிக்கப்படவில்லை. மேலும், வாகனத்தில் கட்டப்பட்டிருந்த கட்சி கொடிக்கும் தேவையான அனுமதி பெறப்பட்டிருந்தது உறுதி செய்யப்பட்டது.
இதையடுத்து அதிகாரிகள் வாகனத்தை செல்ல அனுமதித்தனர்.இந்த திடீர் சோதனை அந்த பகுதியில் சிறிது நேரம் பரபரப்பை ஏற்படுத்தியது.இதற்கிடையில், காரைக்குடியிலும் இதேபோன்ற சோதனை நடந்தது.
நாம் தமிழர் கட்சியின் தலைமை ஒருங்கிணைப்பாளர் சீமான் பயணித்த காரையும் தேர்தல் பறக்கும் படை அதிகாரிகள் தடுத்து நிறுத்தி சோதனை செய்தனர். வாகனத்தை முழுமையாக திறந்து தீவிரமாக ஆய்வு செய்த நிலையில், சோதனை குறித்து சீமான் அதிகாரிகளிடம் கேள்வி எழுப்பியதால் அங்கு குறுகிய நேரத்திற்கு பரபரப்பு நிலவியது.
