மே 15, 2026: கார்ப்பரேட் நிறுவன ஊழியர்கள் இனி பேட்மிண்டன் கோர்ட்டில் தங்களது திறமையை நிரூபிக்க தயாராகி வருகின்றனர். டிவி9 நெட்வர்க் சார்பில் நடத்தப்படும் கார்ப்பரேட் பேட்மிண்டன் சாம்பியன்ஷிப் (CBC) சீசன் 2, இன்று (மே 15, 2026) ஹைதராபாத்தின் கச்சிபௌலியில் உள்ள புல்லேலா கோபிசந்த் பேட்மிண்டன் அகாடமியில் தொடங்கியது. இன்று முதல் மே 17ஆம் தேதி வரை மூன்று நாட்கள் நடைபெறும் இந்த கார்ப்பரேட் பேட்மிண்டன் சாம்பியன்ஷிப்பில், உலகப் புகழ்பெற்ற ஐடி நிறுவனங்கள் மற்றும் பல முன்னணி நிறுவனங்கள் பங்கேற்று வருகின்றன. மைக்ரோசாப்ட், அமேசான், இன்ஃபோசிஸ் உள்ளிட்ட முன்னணி நிறுவனங்களின் பிரதிநிதிகள் இந்த போட்டியில் களமிறங்கியுள்ளனர்.

கடந்த சீசனில் கூகுள், டெல், ஊபர், ஐகேயா, டெலாய்ட், டாக்டர் ரெட்டிஸ் லேபரட்டரீஸ் உள்ளிட்ட 64-க்கும் மேற்பட்ட அணிகள் பங்கேற்று, ஆயிரத்திற்கும் அதிகமான போட்டிகள் நடைபெற்றிருந்தன. இந்த ஆண்டும் அதேபோன்ற உற்சாகமான வரவேற்பு கிடைத்துள்ளதாக கூறப்படுகிறது. இன்று காலை முதலே போட்டிகளில் பங்கேற்க ஊழியர்கள் பெருமளவில் அகாடமிக்கு திரண்டனர். இந்த தொடரில் 300-க்கும் மேற்பட்ட வீரர், வீராங்கனைகள் பங்கேற்று வருகின்றனர்.

இந்திய பேட்மிண்டன் ஜாம்பவானும் பத்மபூஷண் விருது பெற்றவருமான புல்லேலா கோபிசந்த் அவர்களின் வழிகாட்டுதலின் கீழ் இந்த போட்டி நடத்தப்படுகிறது. சர்வதேச தரத்திற்கேற்ப போட்டிகள் ஏற்பாடு செய்யப்பட்டுள்ளன. நாட்டின் மிகவும் புகழ்பெற்ற கோபிசந்த் அகாடமியில் விளையாடும் வாய்ப்பு கிடைத்திருப்பது, கார்ப்பரேட் ஊழியர்களிடையே பெரும் உற்சாகத்தை ஏற்படுத்தியுள்ளது.

சாதாரணமாக ஏசி அறைகளிலும், கணினி திரைகளின் முன்பும் வேலை செய்து வரும் கார்ப்பரேட் ஊழியர்கள், இப்போது பேட்மிண்டன் கோர்ட்டில் தங்களது திறமையை வெளிப்படுத்த தயாராகியுள்ளனர். பணிச்சுமையால் ஏற்படும் மன அழுத்தத்திலிருந்து விடுபடுவதோடு, விளையாட்டு ஆர்வத்தை வெளிப்படுத்தவும் இந்த போட்டி சிறந்த வாய்ப்பாக அமைந்துள்ளது.

இந்த தொடருக்காக சிறப்பான பரிசுத்தொகையும் அறிவிக்கப்பட்டுள்ளது. சாம்பியன்ஷிப் வெற்றியாளர்களுக்கு கோப்பைகளுடன் சேர்த்து மொத்தம் 5 லட்சம் ரூபாய் பரிசுத்தொகை வழங்கப்படுகிறது. இந்த போட்டிகள் முக்கியமாக “டீம் சாம்பியன்ஷிப்” மற்றும் “ஓபன் கேட்டகிரி” என இரண்டு பிரிவுகளாக நடத்தப்படுகின்றன.

ஆண்கள் அணிப் பிரிவில் இரண்டு சிங்கிள்ஸ் மற்றும் ஒரு டபிள்ஸ் போட்டி இடம்பெறும். ஒவ்வொரு அணியிலும் குறைந்தது 3 பேரும், அதிகபட்சம் 5 பேரும் இருக்க வேண்டும். அணியில் உள்ள அனைவரும் ஒரே நிறுவனத்தைச் சேர்ந்தவர்களாக இருக்க வேண்டும் என்பது கட்டாயமாக்கப்பட்டுள்ளது.

இந்த பிரிவில் ஆண்கள் சிங்கிள்ஸ், பெண்கள் சிங்கிள்ஸ் மற்றும் மிக்ஸ்டு டபிள்ஸ் போட்டிகள் இடம்பெறுகின்றன. இந்த பிரிவில் வெவ்வேறு நிறுவனங்களைச் சேர்ந்தவர்கள் இணைந்து அணியாக பங்கேற்கும் வாய்ப்பும் வழங்கப்பட்டுள்ளது.

அலுவலகங்களிலும், கணினி திரைகளின் முன்பும் நீண்ட நேரம் பணியாற்றும் கார்ப்பரேட் ஊழியர்களுக்கான விளையாட்டு தளமாக இந்த நிகழ்ச்சி திட்டமிடப்பட்டுள்ளது. இந்த போட்டியின் மூலம், பல முன்னணி நிறுவனங்களில் பணியாற்றும் தொழில்முறை நிபுணர்களுக்கு தங்களது விளையாட்டு திறமையை வெளிப்படுத்தும் வாய்ப்பு கிடைத்துள்ளது.