திமுக முன்னாள் அமைச்சரும், ஆவடி மத்திய மாவட்டச் செயலாளருமான சா.மு.நாசர் முன்னிலையில் மாற்றுக் கட்சியைச் சேர்ந்த 50-க்கும் மேற்பட்டோர் தாய் கழகமான திமுகவில் அதிகாரப்பூர்வமாகத் தங்களை இணைத்துக் கொண்டனர். இவர்களது வருகை ஆவடி பகுதியில் திமுகவின் பலத்தை மேலும் அதிகரிக்கும் வகையில் அமைந்துள்ளதாக அக்கட்சியினர் மகிழ்ச்சி தெரிவித்துள்ளனர்.

​இதேபோல், சேலம் அருகே உள்ள வெள்ளாளபட்டி பகுதியில் தமிழக வெற்றிக் கழகத்தை (தவெக) சேர்ந்த இளைஞர் அணி மற்றும் மாணவர் அணியைச் சேர்ந்த ஏராளமான இளைஞர்கள் அக்கட்சியிலிருந்து கூண்டோடு விலகியுள்ளனர். மாற்றுக் கட்சிகளில் இருந்து விலகிய அந்த இளைஞர்கள் அனைவரும், முன்னாள் அமைச்சர் ராஜேந்திரன் முன்னிலையில் திமுகவில் தங்களை இணைத்துக் கொண்டனர்.

​அடுத்தடுத்து மாற்றுக் கட்சிகளில் இருந்து நிர்வாகிகள் மற்றும் தொண்டர்கள் விலகி திமுகவில் இணைந்து வருவது, ஆளுங்கட்சியின் தொண்டர்களிடையே பெரும் உற்சாகத்தை ஏற்படுத்தியுள்ளது. குறிப்பாகத் தவெகவின் முக்கிய அணிகளில் இருந்த இளைஞர்கள் விலகி திமுகவில் இணைந்திருப்பது அரசியல் வட்டாரத்தில் பரவலாக விவாதிக்கப்பட்டு வருகிறது.

​சட்டமன்றத் தேர்தல் நெருங்கி வரும் சூழலில், வெவ்வேறு மாவட்டங்களில் மாற்றுக் கட்சியினரின் இந்தத் தொடர் திமுக சேர்க்கை, அப்பகுதிகளில் அக்கட்சியின் களப்பணியை மேலும் வலுப்படுத்தியுள்ளதாகக் கட்சி நிர்வாகிகள் தெரிவித்துள்ளனர்.