கோலிவுட் சினிமாவில் தற்போது அதிகம் பேசப்படும் நபராக இருந்து வருகிறார் ஜெயம் ரவி . கடந்த செப்டம்பர் 9 அம் தேதி தனது மனைவி ஆர்த்தியுடனான திருமண உறவை முடிவு செய்துள்ளதாக ஜெயம் ரவி தெரிவித்தார். இந்த விவாகரத்து இருவரும் பரஸ்பரம் சேர்ந்து எடுத்த முடிவு என்று தெரிவித்திர்ந்தார். இதனைத் தொடர்ந்து ஜெயம் ரவியின் மனைவி ஆர்த்தி அதிர்ச்சி தகவலை வெளியிட்டார்.
"இது முழுக்க முழுக்க என் கவனத்திற்கு வராமலும், என் ஒப்புதல் இல்லாமலும் வெளியான ஒன்று என்பதை தெளிவுபடுத்த விரும்புகிறேன். பரஸ்பர நம்பிக்கை மற்றும் மரியாதையுடன் கடந்த 18 வருடங்களாக நான் வாழ்ந்த வாழ்க்கை இந்த அறிக்கையின் மூலம் அதற்குரிய கௌரவம் கண்ணியம் மற்றும் தனித்தன்மையை இழந்து விட்டதாக நான் உணர்கிறேன். என் கணவரிடம் மனம் விட்டு பேச, என் கணவரை சந்திக்க வேண்டும் என தான் சபீபகாலமாக பலவித முயற்சிகள் செய்தேன். ஆனால் அதற்கான வாய்ப்பு எனக்கு மறுக்கப்பட்டது. நானும் என் இரண்டு குழந்தைகளும் எதுவும் புரியாமல் தவித்து கொண்டிருக்கிறோம். திருமண பந்தத்தில் இருந்து விலக வேண்டும் என்ற இந்த முடிவு முழுக்க முழுக்க சொந்த விருப்பத்தைச் சார்ந்து அவராகவே எடுத்த முடிவே தவிர குடும்ப நலன் கருதி எடுக்கப்பட்ட முடிவு அல்ல." என ஆர்த்தி தெரிவித்திருந்தார்.
நடிகர் ஜெயம் ரவிக்கும் பிரபல பாடகியான கெனிஷா பிரான்ஸிஸ் என்பருக்கும் தொடர்பு இருப்பதாக சினிமா வட்டாரங்களில் தகவல்கள் வெளியாகின. நிகழ்ச்சி ஒன்றில் சந்தித்துக் கொண்டபோது இருவருக்கும் பழக்கம் ஏற்பட்டதாக கூறப்படுகிறது. இது குறித்து தற்போது நடிகர் ஜெயம் ரவி பத்திரிகையாளர் சந்திப்பில் விளக்கமளித்துள்ளார்
எம் ராஜேஷ் இயக்கத்தில் ஜெயம் ரவி நடித்துள்ள பிரதர் திரைப்பத்தின் டீசர் இன்று வெளியாகியது. அப்போது பத்திரிகையாளர்களை சந்தித்த ஜெயம் ரவி தன்னைப் பற்றிய வதந்திகளுக்கு பதிலளித்தார் “வாழு வாழவிடு. ஒரு பாடகியுடன் என்னை தொடர்புபடுத்தி பேசுகிறார்கள். அப்படி பண்ணாதீங்க. கெனிஷா 600 லைவ் ஷோக்களில் பாடியவர். தனது வாழ்க்கையில் சொந்தமாக இந்த இடத்திற்கு வந்தவர். நிறைய பேருக்கு உதவி செய்திருக்கிறார்.அவர் ஒரு அங்கீகரிக்கப்பட்ட மனநல ஆலோசகர். நானும் அவரும் சேர்ந்து ஹீலிங் மையம் ஒன்றை தொடங்குவது தான் எங்களது நோக்கம். அதை கெடுக்காதீங்க. அதை யாரும் கெடுக்கவும் முடியாது” என்று ஜெயம் ரவி தெரிவித்துள்ளார்
