தமிழகத்தில் பெண்களுக்கு எதிராக நடைபெற்று வரும் பாலியல் வன்கொடுமைகளை கட்டுப்படுத்த தவறியதாக தமிழக அரசை கண்டித்து அதிமுக சார்பில் தமிழகமெங்கும் இன்று ஆர்பாட்டம் நடந்தது.

ஆர்ப்பாட்டத்திற்கு காவல்துறை அனுமதி அளிக்காத நிலையில் தடையை மீறி மதுரையில் நடந்த ஆராட்டத்தில் கலந்துகொண்டு பேசிய முன்னாள் அமைச்சர் செல்லூர் ராஜூ, "கலைஞரின் ஆட்சியையே அதிமுகவினர் பார்த்தவர்கள், பனங்காட்டு நரி, யாருக்கும் அஞ்சம் மாட்டோம். போராட்டத்தில் ஈடுபடும் அதிமுகவினரை காவல்துறை உருட்டுகிறது, மிரட்டுகிறது. அதிமுக ஆட்சி காலத்தில் காவல்துறை சுதந்திரமாக செயல்பட்டது.

பெண்கள் கல்வி கற்க , ஜெயலலிதா ஆட்சி காலத்தில் பல்வேறு திட்டங்கள் கொண்டு வரப்பட்டது, பெண்களுக்காக அதிமுக ஆட்சியில் கொண்டு வரப்பட்ட அனைத்து திட்டமும் திமுக ஆட்சியில் முடக்கப்பட்டது.

அதிமுக ஆட்சியில் தமிழ்நாடு காவல்துறை ஸ்காட்லாந்து யார்டு காவல்துறைக்கு இணையாக செயல்பட்டது, துணை ராணுவத்தால் பிடிக்க முடியாத சந்தன கடத்தல் வீரப்பனை அதிமுக ஆட்சியில் காவல்துறை சுட்டு பிடித்தது. தற்போது தமிழகத்தின் ஆட்சி குரங்கு கையில் கிடைத்த பூமாலை போல ஆகியுள்ளது, எடப்பாடி பழனிசாமியின் ஆட்சியை யாரும் குறை சொல்ல முடியாத அளவிற்கு நடத்தி காட்டியுள்ளார்.  எதிர்க்கட்சியினர் வியக்கும் அளவிற்கு அதிமுக ஆட்சியை எடப்பாடி பழனிசாமி நடத்தி காட்டியுள்ளார், தமிழக மக்களுக்காக நடைபெற்ற அதிமுக ஆட்சியை, ஊர் ஊராக சென்று ஜீபூம்பா வேலை செய்து ஆட்சியை பிடித்துவிட்டார்.

அதிமுக ஆட்சியில் 24,000 போராட்டங்கள் நடந்துள்ளன, அப்போதிருந்த சமூக ஆர்வலர்களெல்லாம் இப்போது எங்கே போனார்கள்? அதிமுக ஆட்சியை விமர்சனம் செய்த நடிகர் சூர்யா எங்கே சென்றார்? என்று தெரியவில்லை. திமுக எப்போது ஆட்சிக்கு வந்தாலும் பெண்களுக்கு எதிரான வன்கொடுமைகள் நடைபெறுகிறது.

பல்கலைக்கழக மாணவி பாதிக்கப்பட்ட சம்பவத்தில் "சார்" என்பவர் யார்?, "சார்" எனும் நபரை காப்பற்ற திமுக அரசு கபட நாடகம் நடத்துகிறது, மேலும், பாலியல் வன்கொடுமை வழக்கில் தேசிய பெண்கள் ஆணையம் தாமாக முன்வந்து விசாரணை நடத்துகிறது. உயர் நீதிமன்றம் அடுக்கடுக்கான கேள்விகளை கேட்டிருக்கிறது. எந்த கொம்பனாலும் குறை சொல்ல முடியாத ஆட்சி என ஸ்டாலின் திமுக அரசை பாராட்டி பேசினார், ஆனால், தேசிய மகளிர் ஆணையமும், உயர் நீதிமன்றமும் குறை சொல்லி உள்ளது" என்று பேசினார்.

ஒரு மணி நேரத்திற்கு மேலாக போராட்டம் நடைபெற்றதை தொடர்ந்து செல்லூர் ராஜூ உள்ளிட்ட அதிமுகவினரை காவல்துறையினர் கைது செய்து திருமண மண்டபத்தில் வைத்தனர்.