சமூக ஊடகங்களில் தற்போது வேகமாக பரவி வரும் ஒரு வீடியோ, பார்ப்போரிடம் சிரிப்பையும் ஆச்சரியத்தையும் ஏற்படுத்தியுள்ளது. சர்ஃபிங் செய்து கொண்டிருந்த ஒரு இளைஞர், திடீரென ஒரு வாத்தால் தாக்கப்பட்டு தண்ணீரில் விழும் காட்சி, பலரையும் வியப்பில் ஆழ்த்தியுள்ளது. இந்த வீடியோ @ranjeetraiderr15 என்ற இன்ஸ்டாகிராம் பக்கத்தில் பகிரப்பட்டு, குறுகிய நேரத்தில் ஆயிரக்கணக்கான பார்வைகள் மற்றும் நூற்றுக்கணக்கான கருத்துகள் பெற்றுள்ளது.

வீடியோவில், திறமையாக சுழன்று சர்ஃபிங் செய்கிற ஒரு இளைஞரின் பின்னால், ஒரு வாத்து மெதுவாக நீந்தி வருகிறது. முதலில் அந்த வாத்தை கவனிக்காமல் இருந்த இளைஞர், சில விநாடிகளில் அதிர்ச்சியடைகிறார். வாத்து நேராக அவருடைய சர்ஃபிங் போர்டைத் தாக்க, திடீரென அவர் தண்ணீரில் விழுகிறார். அதுவும் பலகையுடன் சேர்ந்து விழுந்ததால், மீண்டும் எழுவதற்கே தைரியம் தேவைப்படும் அளவுக்கு வீடியோ திகிலூட்டும் வகையில் உள்ளது.

இந்த வீடியோவிற்கு நெட்டிசன்கள் பலரும் நகைச்சுவையுடனும், பரிதாபத்துடனும் கருத்துக்களை பதிவிட்டு வருகின்றனர். ஒருவர் “அந்த சர்ஃபர் பயங்கரமான காயத்துக்கு உள்ளானிருக்கலாம்” என கவலையுடன் குறிப்பிட்டுள்ளார். மேலும் “இன்னும் கொஞ்சம் சர்ஃபிங் பண்ணுங்க” என பதிவிட்டவர்களும் உண்டு. மனிதர் நம்பிக்கையுடன் விளையாடும் இடத்தில், ஒரு வாத்தின் நடவடிக்கை திடீர் திருப்பமாக மாறிய இந்த வீடியோ, தற்போது இணையத்தில் பரபரப்பாக விவாதிக்கப்படுகிறது.