इंडियन प्रीमियर लीग २०२५ स्पर्धेत ६८ वा सामना सनरायझर्स हैदाराबाद विरुद्ध कोलकाता नाईट रायडर्स संघात खेळवला जात आहे. दिल्लीतील अरुण जेटली स्टेडियमवर होत असलेल्या या सामन्यात ट्रॅव्हिस हेड आणि हेनरिक क्लासेन यांनी मैदानात दणाणून सोडले.

या दोघांनीही वादळी खेळ करताना संघाला शेवटच्या सामन्यात केलेल्या आक्रमणामुळे संघ सहज २५० पार पोहचला. क्लासेनने तर शतकी खेळी केली. हैदराबादने कोलकातासमोर २७९ धावांचे लक्ष्य ठेवले आहे. हे यंदाच्या हंगामातील दुसऱ्या क्रमांकाचे सर्वोच्च लक्ष्य आहे.

या सामन्यात कर्णधार पॅट कमिन्सने नाणेफेक जिंकून प्रथम फलंदाजी करण्याचा निर्णय घेतला होता. त्यानंतर हैदराबादच्या फलंदाजांकडून वादळी खेळ पाहायला मिळाला. हैदराबादने २० षटकात ३ बाद २७८ धावा केल्या.

ही तिसऱ्या क्रमांकाची सर्वोच्च धावसंख्या आहे, तर यंदाच्या हंगामातील दुसऱ्या क्रमांकाची सर्वोच्च धावसंख्या आहे. विशेष म्हणजे आता आयपीएलमध्ये पहिल्या ४ सर्वोच्च धावसंख्या हैदराबादने केल्या आहेत. तसेच हैदराबादने सर्वाधिक ५ वेळा टी२०मध्ये २५० धावांचा टप्पा पार केला आहे.