आयसीसी वर्ल्ड टेस्ट चॅम्पियनशीप 2025 अंतिम सामन्यातील तिसऱ्या दिवशी ऑस्ट्रेलियाने दक्षिण आफ्रिकेसमोर विजयासाठी 282 धावांचं आव्हान ठेवलं आहे. ऑस्ट्रेलियाकडे दुसऱ्या डावात 76 धावांची आघाडी होती. तर कांगारुंनी त्यानंतर दुसऱ्या डावात 65 षटकांमध्ये सर्वबाद 207 धावा केल्या. वेगवान गोलंदाज मिचेल स्टार्क याने चिवट अर्धशतकी खेळी करुन ऑस्ट्रेलियाला मोठी आघाडी मिळवून देण्यात निर्णायक भूमिका बजावली. स्टार्कने केलेल्या खेळीमुळे ऑस्ट्रेलियाला 280 पेक्षा अधिक धावांची आघाडी मिळवता आली. ऑस्ट्रेलियाचा डाव आटोपताच लंच ब्रेक जाहीर करण्यात आला. आता त्यानंतर दक्षिण आफ्रिकेची सलामी जोडी कशाप्रकारे सुरुवात करते? याकडे चाहत्यांचं लक्ष असणार आहे.
दक्षिण आफ्रिकेने टॉस जिंकून ऑस्ट्रेलियाला बॅटिंगसाठी भाग पाडलं. ऑस्ट्रेलियाने पहिल्या डावात ऑलआऊट 212 धावा केल्या. त्यानंतर दक्षिण आफ्रिकेकडे मोठी धावसंख्या करुन आघाडी घेण्याची संधी होती. मात्र ऑस्ट्रेलियाच्या गोलंदाजांनी तसं होऊ दिलं नाही. दक्षिण आफ्रिकेचा पहिला डाव हा अवघ्या 138 धावांवर आटोपला. त्यामुळे ऑस्ट्रेलियाला 74 धावांची आघाडी मिळाली. दक्षिण आफ्रिकेसाठी डेव्हिड बेडिंगहॅम याने सर्वाधिक 45 धावा केल्या. तर कॅप्टन टेम्बा बावुमा याने 36 रन्स केल्या. तर इतरांना काही विशेष करता आलं नाही. ऑस्ट्रेलियासाठी कर्णधार पॅट कमिन्स याने सर्वाधिक 6 विकेट्स मिळवल्या. तर मिचेल स्टार्क याने दोघांना मैदानाबाहेरचा रस्ता दाखवला.
