बेंगळुरूमधील एम चिन्नास्वामी स्टेडियममध्ये झालेल्या चेंगराचेंगरीच्या प्रकरणात भारतीय क्रिकेट नियामक मंडळाने कठोर भूमिका स्वीकारली आहे. भविष्यात असा कोणताही अपघात होऊ नये, म्हणून बीसीसीआयने नवीन धोरण तयार करण्याची घोषणा केली आहे. यासाठी, बोर्डाने एक नवीन समिती स्थापन केली आहे. जी या प्रकरणात मार्गदर्शक तत्त्वे तयार करेल. शनिवारी झालेल्या बीसीसीआयच्या सर्वोच्च परिषदेच्या बैठकीत हा निर्णय घेण्यात आला आणि ही जबाबदारी ३ सदस्यीय समितीकडे सोपवण्यात आली आहे.

४ जून रोजी रॉयल चॅलेंजर्स बंगळुरूच्या उत्सवादरम्यान झालेल्या अपघातात ११ जणांचा मृत्यू झाला. शनिवारी झालेल्या बीसीसीआयच्या सर्वोच्च परिषदेच्या बैठकीत अनेक मुद्द्यांवर चर्चा झाली आणि काही महत्त्वाचे निर्णय घेण्यात आले. यातील सर्वात महत्त्वाचा निर्णय बंगळुरू अपघाताशी संबंधित होता. ज्यावर सर्वांच्या नजरा खिळल्या होत्या. बैठकीनंतर बीसीसीआयने एक निवेदन जारी केले आणि त्यात सर्वप्रथम बंगळुरू चेंगराचेंगरी आणि अहमदाबाद विमान अपघाताबद्दल दुःख व्यक्त केले.

यासोबतच, भविष्यात बंगळुरू अपघातासारख्या घटना घडू नयेत यासाठी बोर्डाने वरिष्ठ अधिकाऱ्यांची एक समिती स्थापन केली. बीसीसीआयने आपल्या निवेदनात म्हटले आहे की, ३ सदस्यांची समिती सविस्तर तत्त्वे तयार करेल, जी भविष्यात अशा कार्यक्रमांदरम्यान अंमलात आणली जातील. या समितीचे अध्यक्ष मंडळाचे सचिव देवजीत सैकिया असतील. तर बीसीसीआयचे उपाध्यक्ष राजीव शुक्ला आणि कोषाध्यक्ष प्रभतेज सिंग हे देखील त्याचा भाग असतील. हे तिन्ही अधिकारी मंडळातील सर्वात शक्तिशाली पदांवर आहेत.