Israel Iran Conflict News :इराण आणि इस्रायलमध्ये संघर्ष सुरु आहे. 13 जून रोजी इस्त्रायलने इराणवर हल्ला केला. या हल्ल्यात इस्त्रायलने इराणमधील महत्वाच्या लोकांना लक्ष्य केले. त्यात इराणचे सैन्य दल प्रमुख, कमांडर आणि अणू शास्त्रज्ञ यांचा मृत्यू झाला. त्यामुळे इराणला मोठा धक्का बसला. परंतु आता चार दिवसानंतर महत्वाचा रिपोर्ट समोर आला आहे. इराणने अणू शास्त्रज्ञांचा मृत्यूचा बदला घेतला आहे.
रविवारी पहाटे इराणी क्षेपणास्त्रांनी इस्रायलच्या महत्वाच्या केंद्रावर हल्ला केला. इस्त्रायलच्या वैज्ञानिक शक्तीचा पाया रचलेल्या ठिकाणीच हल्ला केला. इराणने इस्त्रायलच्या वेझमन इन्स्टिट्यूट ऑफ सायन्सला लक्ष्य केले. जे इस्रायलच्या वैज्ञानिक प्रतिष्ठेचे आणि तांत्रिक ओळखीचे प्रतीक मानले जाते. वेझमन इन्स्टिट्यूट येथेच इस्रायलचा पहिला संगणक विकसित झाला होता. इस्त्रायलचे आधुनिक संशोधन केंद्र म्हणून वेझमन इन्स्टिट्यूची ओळख आहे. त्यामुळे त्या ठिकाणी इराणकडून झालेला हल्ला केवळ लष्करी हल्ला नव्हता तर एक गंभीर प्रतीकात्मक हल्ला होता. इराणाने त्या माध्यमातून कोठर संदेश दिला. तुम्ही आमच्या शास्त्रज्ञांना मारले तर आम्ही तुमच्या ज्ञानाचे केंद्रच उद्ध्वस्त केले.
इराणच्या हल्ल्यात वेझमन इन्स्टिट्यूटच्या दोन इमारती पूर्णपणे नष्ट झाल्या. त्यात एक बायोलॉजिकल सायन्स लॅब होती. दुसऱ्या इमारतीचे काम सुरु होते. जवळपास असणाऱ्या इतर इमारतींचे मोठे नुकसान झाले आहे. खिडक्या तुटल्या आहेत. हाय टेक रिसर्च उपकरणांची राख झाली आहे. या हल्ल्यात कोणतीही जीवीत हानी झाली नाही. परंतु अनेक वर्षांची मेहनत वाया गेल्याचे शास्त्रज्ञांकडून सांगितले गेले. या प्रयोगशाळा पुन्हा सुरु करण्यासाठी अनेक वर्ष लागतील, असेही शास्त्रज्ञांनी म्हटले.
वेझमन इन्स्टिट्यूटचा लक्ष्य करण्यामागे इराणचा विशिष्ट उद्देश होता. वेझमन इन्स्टिट्यूटचा संबंध सरळ संरक्षण उद्योगांसोबत होता. या ठिकाणी झालेले संशोधन संरक्षण कंपन्यांना दिले जात होते. त्यामुळे ही संस्था केवळ वैज्ञानिक नाही तर सुरक्षेच्या मोर्चावरसुद्धा महत्वाची होती. त्याच ठिकाणी हल्ला करुन इस्त्रायलला मोठा धक्का इराणने दिला आहे.
