உத்தரப்பிரதேச மாநிலம் ஜாலௌன் மாவட்டம் ஒரை பகுதியில் அதிர்ச்சியூட்டும் குடும்ப வன்முறை சம்பவம் பதிவாகியுள்ளது. ஜூன் 19ம் தேதி இரவு, தனது இரண்டாவது மனைவியான 35 வயதான ஆம்னாவை, கணவர் ஆரிப் மற்றும் அவரது குடும்பத்தினர் சேர்ந்து வீட்டின் இரண்டாவது மாடியில் இருந்து தள்ளி விட்டதாக புகார் எழுந்துள்ளது.

இந்த சம்பவம் வீட்டு வெளியேபொறுத்தப்பட்டிருந்த சிசிடிவி கேமராவில் பதிவாகிய நிலையில், அந்த வீடியோ தற்போது சமூக வலைதளங்களில் வைரலாகி வருகிறது.

ஆம்னாவின் தந்தையான கமர் சித்திகி அளித்த புகாரின் பேரில், தனது மகள் ஆரிபை 4 ஆண்டுகளுக்கு முன் இரண்டாவது திருமணமாக மணந்துள்ளதாகவும், முதல் திருமணத்தில் பிறந்த மூன்று குழந்தைகளில் இரு குழந்தைகளை திருமணத்துக்குப் பிறகு வீட்டிலிருந்து வெளியே அனுப்பிவைத்ததாகவும் கூறினார்.

மேலும், ஆம்னாவை வீட்டில் வைக்க ரூ.1 கோடி வரதட்சணை கொண்டுவர வேண்டும் எனக் கேட்டதால் தகராறு ஏற்பட்டுள்ளது. இதையடுத்து ஜூன் 19 மாலை, அவரது பேரன் கொடுத்த தகவலின்பேரில் கமர் சித்திகி சம்பவ இடத்துக்கு வந்து, ஆம்னாவை மாவட்ட மருத்துவமனையில் சேர்த்தார். பின்னர் மேல் சிகிச்சைக்காக மருத்துவக் கல்லூரி மருத்துவமனைக்கு மாற்றப்பட்டார்.