அமேசான் நிறுவனம், நீங்கள் வீட்டிலிருந்து வெளியேறாமலேயே ஆய்வக பரிசோதனைகளை செய்து கொள்ளும் வசதியை அறிமுகப்படுத்தியுள்ளது.

‘அமேசான் டயக்னாஸ்டிக்ஸ்’ என்ற பெயரில் தொடங்கப்பட்டுள்ள இந்த புதிய சேவை, 60 நிமிடங்களுக்குள் உங்கள் ரத்த மாதிரிகளை சேகரித்து, 6 மணி நேரத்தில் டிஜிட்டல் அறிக்கைகளை வழங்கும் என்று உறுதியளிக்கிறது.

இந்த புதிய சேவை டெல்லி, குர்கான், நொய்டா, மும்பை, பெங்களூரு மற்றும் ஹைதராபாத் ஆகிய நகரங்களில் 450-க்கும் மேற்பட்ட பின்கோடுகளில் கிடைக்கிறது. அமேசான் செயலி மூலம் 800-க்கும் மேற்பட்ட பல்வேறு பரிசோதனைகளை நேரடியாக முன்பதிவு செய்யலாம். மாதிரி சேகரிப்பில் இருந்து இறுதி அறிக்கை வரை அனைத்தையும் நீங்கள் கண்காணிக்க முடியும்.

இதை சாத்தியமாக்க, அமேசான் நிறுவனம் பெங்களூருவை தளமாக கொண்ட ஆரஞ்சு ஹெல்த் லேப்ஸ் என்ற நிறுவனத்துடன் இணைந்துள்ளது. ஆரஞ்சு ஹெல்த் லேப்ஸ் ஏற்கனவே பல நகரங்களில் விரைவான, வீட்டுக்கே சென்று ரத்த பரிசோதனை உள்பட அனைத்து வகையான பரிசோதனைகளை வழங்கி வருகிறது.

இந்த சேவை எப்படி வேலை செய்கிறது? என்ற கேள்விக்கு பதில் இதுதான். நீங்கள் அமேசான் செயலிக்கு சென்று, உங்களுக்கு தேவையான பரிசோதனையை தேர்ந்தெடுத்து, உங்களுக்கு பொருத்தமான நேரத்தை முன்பதிவு செய்யலாம். ஒரு மருத்துவ நிபுணர் உங்கள் வீட்டிற்கு வந்து ரத்த மாதிரியை சேகரிப்பார். அடிப்படை பரிசோதனைகளுக்கான உங்கள் அறிக்கை பொதுவாக சில மணிநேரங்களுக்குள் உங்கள் மொபைலுக்கு அனுப்பப்படும்.

ஆய்வக பரிசோதனைகளை செய்வதில் ஏற்படும் வழக்கமான தாமதங்களையும், குழப்பங்களையும் குறைக்க அமேசான் விரும்புவதாக தெரிவிக்கிறது. இனி கிளினிக்குகளுக்கு பயணம் செய்யவோ, நீண்ட வரிசையில் காத்திருக்கவோ, அருகிலுள்ள ஆய்வகத்தை கண்டுபிடிக்க சிரமப்படவோ தேவையில்லை. இந்தியாவில் அமேசானின் சுகாதாரப் பணிகளை வழிநடத்தும் ஜெயராமகிருஷ்ணன் பாலசுப்பிரமணியன், சுகாதார சேவைகளை அனைவருக்கும் “எளிதாகவும், நம்பகமானதாகவும்” மாற்றுவதே தங்கள் இலக்கு என்று கூறினார்.

இந்த புதிய சேவை, அமேசானின் முழுமையான சுகாதார தளத்தை உருவாக்கும் திட்டத்தின் ஒரு பகுதியாகும். இது ஏற்கனவே மருந்துகளை ஆர்டர் செய்யக்கூடிய ‘அமேசான் பார்மசி’ மற்றும் ஆன்லைன் மருத்துவர் ஆலோசனைகளை வழங்கும் ‘அமேசான் கிளினிக்’ ஆகியவற்றை நடத்தி வருகிறது.

இப்போது, ஆய்வக பரிசோதனைகளும் சேர்க்கப்பட்ட நிலையில், ஒரு மருத்துவரிடம் பேசுவது, பரிசோதனைகள் செய்வது மற்றும் மருந்துகளை ஆர்டர் செய்வது என அனைத்தையும் ஒரே செயலியிலிருந்து அமேசான் வழங்குகிறது.

இந்த சேவை தற்போது ஆறு நகரங்களில் மட்டுமே இருந்தாலும், இது வெற்றி பெற்றால், அமேசான் விரைவில் மேலும் பல இடங்களுக்கு இதை விரிவுபடுத்தலாம்.