सोलापूर : मध्य रेल्वेचे महाव्यवस्थापक व मध्य रेल्वेच्या वरिष्ठ अधिकाऱ्यांनी पुणे येथे पुणे व सोलापूर विभागातील खासदारांसोबत (सोमवारी ता. २३) बैठक घेतली. या बैठकीला खासदार प्रणिती शिंदे यांची अनुपस्थिती होती. खासदार प्रणिती शिंदे यांना वगळता सोलापूर विभागातील इतर सर्व खासदार उपस्थित होते.

मध्य रेल्वेचे महाव्यवस्थापक धरम वीर मीणा, प्रधान विभाग प्रमुख तसेच पुणे व सोलापूर विभागाचे विभागीय रेल्वे व्यवस्थापक यांच्या उपस्थितीत सोमवारी (ता. २३) पुणे येथील विभागीय रेल्वे व्यवस्थापक कार्यालयातील हॉलमध्ये पुणे व सोलापूर विभागातील खासदारांसोबत बैठक झाली.

या बैठकीस माननीय खासदार सुप्रिया सुळे (बारामती), श्रीरंग बारणे (मावळ), ओमप्रकाश राजेनिंबाळकर (धाराशिव), धैर्यशील मोहिते-पाटील (माढा), डॉ. अमोल कोल्हे (शिरूर), भाऊसाहेब वाकचौरे (शिर्डी), नीलेश लंके (अहिल्यानगर), विशाल पाटील (सांगली), रजनी पाटील (राज्यसभा, बीड), नितीन जाधव-पाटील, शिवाजी काळगे, माया नारोलिया (होशंगाबाद) मेधा कुलकर्णी (राज्यसभा, पुणे) यांनी उपस्थिती दर्शविली. या बैठकीत खासदार सुळे यांनी या समितीच्या अध्यक्षा म्हणून काम पाहिले.

मी ओडिसा दौऱ्यावर आहे. येथे महिलांवरील अत्याचारात वाढ झालेली आहे. त्यासंदर्भात दौरा आहे. यामुळे बैठकीला नव्हते. माझ्या वतीने प्रतिनिधीला पाठविले होते.

- प्रणिती शिंदे, खासदार, सोलापूर