राजस्थानमधील चुरू येथे आज वायुसेनेचं एक विमान कोसळल्याची घटना घडली आहे. हा अपघात रतनगड मधील भानूदा गावामध्ये घडला. विमानाच्या ढिगाऱ्यामध्ये एक मृतदेह सापडला आहे. हा मृतदेह विमानाच्या पायलटचा असावा असा अंदाज व्यक्त केला जात आहे. दरम्यान घटनेची माहिती मिळताच वायुसेनेचं एक पथक घटनास्थळी रवाना झालं आहे.

घटनेबाबत अधिक माहिती अशी की राजस्थानातल्या रतनगड मधील भानूदा गावात हा भीषण अपघात घडला आहे. भारतीय वायुसेनेचं विमान कोसळलं. स्थानिक लोकांनी या अपघाताची माहिती पोलिसांना दिली. दरम्यान घटनेची माहिती मिळताच पोलिसांची एक टीम अपघातस्थळी दाखल झाली, पोलिसांकडून तातडीनं घटनास्थळी बचाव कार्याला सुरुवात झाली. मात्र अद्याप तरी या विमानाच्या पायलट संदर्भात कोणतीही अधिकृत माहिती समोर आलेली नाहीये.

200 फूट परिसरात पसरला विमानाचा मलबा

चुरू जिल्ह्यातल्या रतनगढ तहसीलच्या बॉर्डरवर असलेल्या भानूदा गावात हा अपघात घडला आहे. वायूसेनेचं विमान कोसळलं आहे. या अपघाताबाबत माहिती देताना स्थानिक नागरिकांना सांगितलं की, आकाशातून एक जळत असलेलं विमान खाली कोसळलं. हा अपघात इतका भीषण होता की, या विमानाचा मलबा तब्बल दोनशे फूट परिसरात विखूरला गेला, विमानाचे पार्ट दूरवर उडाले.

दरम्यान आतापर्यंत घटनास्थळी एक मृतदेह आढळून आला आहे. मात्र जेव्हा अपघात झाला तेव्हा विमानात नक्की किती लोकं होते? याबाबत अद्याप कोणतीही माहिती समोर आलेली नाहीये. अपघाताच्या घटनेनंतर परिसरातील नागरिकांनी मोठ्या संख्येनं अपघातस्थळी गर्दी केली होती, या विमानामध्ये एक किंवा दोन लोक असावेत असा अंदाज व्यक्त केला जात आहे.

दरम्यान यापूर्वी मार्च-एप्रिलमध्ये देखील अशाच दोन घटना घडल्या होत्या. यापूर्वी दोन एप्रिलला गुजरातच्या जामनगर परिसरात भारतीय वायुसेनेचं जागवॉर प्लेन क्रॅश झालं होतं. दोन एप्रिल रोजी रात्री साडेनऊच्या सुमारास हा अपघात घडला होता. अपघात झाला तेव्हा या विमानात दोन पायलट होते, त्यातील एकाचा मृत्यू झाला तर एक थोडक्यात बचावला.

तर दुसरी घटना अंबालामध्ये घडली होती. अंबाला एअर बेसवरून या विमानानं उड्डानं केलं होतं. मात्र पंचकुलाच्या जवळपास या विमानाचा अपघात झाला.