England vs India, 3rd Test at Lord's, London: शुभमन गिल हा इंग्लंडच्या या दौऱ्यात विराट कोहलीची उणीव जाणवू देत नाही. फलंदाजीत चौथ्या क्रमांकावर मिळालेल्या संधीचं तर त्याने सोनं केलं आहेच, शिवाय त्याच्यात विराटची आक्रमकताही दिसतेय. तो इंग्लंडच्या खेळाडूंची स्लेजिंग करताना दिसतोय आणि त्याला मोहम्मद सिराजची साथ मिळाली. जो रूट व ऑली पोप यांचा संयम तोडण्यासाठी या दोघांनी टोमण्यांचा बाऊन्सर टाकलेला दिसला.

इंग्लंडला २ बाद ४४ धावांवरून जो रूट व ऑली पोप या जोडीने शतकी भागीदारी करून भारताची डोकेदुखी वाढवली. नाणेफेक जिंकून प्रथम फलंदाजीला आलेल्या इंग्लंडला एका तासानंतर दोन धक्के बसले. नितीश कुमारने त्याच्या पहिल्या व डावातील १४ व्या षटकात बेन डकेट ( २३) व झॅक क्रॉली ( १८) या दोन्ही सलामीवीरांना माघारी पाठवले. पण, जो रूट व ऑली पोप यांनी शतकी भागीदारी करून संघाला सावरले.

भारताचा यष्टिरक्षक रिषभ पंत बोटाच्या दुखापतीमुळे मैदानाबाहेर जावे लागले. ध्रुव जुरेल यष्टींमागे उभा आहे. मोहम्मद सिराज आणि कर्णधार शुभमन गिल यांनी या जोडीची एकाग्रता भंग करण्याचा भरपूर प्रयत्न केला, परंतु त्याचा फार फरक नाही पडला. रूटने भारताविरुद्ध कसोटीत ३००० धावा करणाऱ्या पहिल्या फलंदाजाचा मान या कसोटीत पटकावला. इंग्लंडने दुसऱ्या सत्रात एकही विकेट न गमावा २४ षटकांत ७० धावा केल्या.