இந்தியா மற்றும் இங்கிலாந்து அணிகளுக்கு இடையே நடைபெற்ற பரபரப்பான டெஸ்ட் தொடர் பல சாதனைகள் மற்றும் மைல்கற்களை படைத்துள்ளது. குறிப்பாக, இந்த தொடரில் இந்திய அணியின் கேப்டன் சுப்மன் கில் மற்றும் இங்கிலாந்து அணியின் ஜோ ரூட், பென் ஸ்டோக்ஸ் ஆகியோர் பல்வேறு சாதனைகளை முறியடித்துள்ளனர்.

1. சுப்மன் கில்லின் சாதனைகள்: இருதரப்பு டெஸ்ட் தொடரில் அதிக ரன்கள்: ஐந்து டெஸ்ட் போட்டிகளில் 754 ரன்கள் குவித்து, 1990-ஆம் ஆண்டு கிரஹாம் கூச் (752 ரன்கள்) வைத்திருந்த சாதனையை கில் முறியடித்தார். இது இந்தியா-இங்கிலாந்து இருதரப்பு டெஸ்ட் தொடரில் ஒரு வீரரால் எடுக்கப்பட்ட அதிகபட்ச ரன்கள் ஆகும்.

2. கேப்டனாக அதிக ரன்கள்: சுனில் கவாஸ்கர் (732 ரன்கள்) சாதனையை முறியடித்து, டெஸ்ட் தொடரில் கேப்டனாக அதிக ரன்கள் குவித்த இந்திய வீரர் என்ற பெருமையை கில் பெற்றார். இந்த பட்டியலில் டான் பிராட்மேன் (810 ரன்கள்) மட்டுமே கில்லை விட முன்னிலையில் உள்ளார்.

3. வெளிநாட்டில் 700+ ரன்கள்: SENA (தென் ஆப்பிரிக்கா, இங்கிலாந்து, நியூசிலாந்து, ஆஸ்திரேலியா) நாடுகளில் நடைபெற்ற டெஸ்ட் தொடரில் 700+ ரன்கள் அடித்த முதல் ஆசிய வீரர் என்ற சாதனையை கில் படைத்தார். இதன் மூலம், 2014-15 ஆஸ்திரேலியத் தொடரில் விராட் கோலி அடித்த 692 ரன்கள் சாதனையை முறியடித்தார்.

4. கேப்டனாக அதிகபட்ச தனிநபர் ஸ்கோர்: எட்ஜ்பாஸ்டனில் கில் அடித்த 269 ரன்கள், இந்திய டெஸ்ட் கேப்டன் ஒருவரால் அடிக்கப்பட்ட அதிகபட்ச தனிநபர் ஸ்கோராகும். இது விராட் கோலியின் 254 ரன்கள் சாதனையை முறியடித்தது.

5. SENA நாடுகளில் இரட்டை சதம்: SENA நாடுகளில் டெஸ்ட் போட்டியில் இரட்டை சதம் அடித்த முதல் ஆசிய கேப்டன் என்ற பெருமையையும் கில் பெற்றார்.

6. ஒரு போட்டியில் அதிக ரன்கள்: கில் இரண்டாவது டெஸ்டில் 430 ரன்கள் (269 மற்றும் 161) எடுத்து, இங்கிலாந்தில் ஒரு வெளிநாட்டு வீரரால் ஒரு டெஸ்ட் போட்டியில் எடுக்கப்பட்ட அதிகபட்ச ரன்கள் என்ற சாதனையை முறியடித்தார்.

7. பென் ஸ்டோக்ஸ்: ஒரே டெஸ்ட் போட்டியில் சதம் அடித்ததுடன் ஐந்து விக்கெட்டுகளையும் வீழ்த்திய முதல் இங்கிலாந்து கேப்டன் என்ற பெருமையை பென் ஸ்டோக்ஸ் பெற்றார்.

8. ரிஷப் பந்த்: தொடக்க டெஸ்ட் போட்டியில் இரு இன்னிங்ஸ்களிலும் சதம் அடித்த முதல் இந்திய விக்கெட் கீப்பர் என்ற சாதனையை ரிஷப் பந்த் படைத்தார்.

9. ஜோ ரூட்: இந்தத் தொடரில் 537 ரன்கள் குவித்ததன் மூலம், டெஸ்ட் வரலாற்றில் அதிக ரன்கள் அடித்த வீரர்களின் பட்டியலில் டிராவிட், காலீஸ் மற்றும் பாண்டிங் ஆகியோரை பின்னுக்குத் தள்ளி இரண்டாவது இடத்தை பிடித்தார். இந்த பட்டியலில் சச்சின் டெண்டுல்கர் மட்டுமே முன்னிலையில் உள்ளார்.

10. ஜோ ரூட்டின் பிற சாதனைகள்: உலக டெஸ்ட் சாம்பியன்ஷிப் தொடரில் 6000 ரன்கள் அடித்த முதல் வீரர் என்ற பெருமையைப் பெற்றார். மேலும், ஒரு அணிக்கு எதிராக (இந்தியா) தனது சொந்த மண்ணில் அதிக சதங்கள் (10) அடித்த வீரர் என்ற சாதனையையும் அவர் படைத்துள்ளார்.

Author: Bala Siva