मुंबई : पेटीएमची मूळ कंपनी वन९७ कम्युनिकेशन्स लिमिटेडच्या शेअर्समध्ये आज १३ ऑगस्ट रोजी जोरदार तेजी आहे. शेअर्स ६ टक्क्यांनी वाढून १,१८७ रुपयांवर पोहोचला. पेटीएमच्या शेअर्सचा हा ५२ आठवड्यांचा नवा उच्चांक आहे. आरबीआयच्या मंजुरीनंतर Paytm च्या शेअर्समध्ये ही वाढ झाली आहे. पेटीएमच्या उपकंपनी 'पेटीएम पेमेंट्स सर्व्हिसेस लिमिटेड (पीपीएसएल)' ला ऑनलाइन पेमेंट अ‍ॅग्रीगेटर म्हणून काम करण्यासाठी आरबीआयने तत्वतः मान्यता दिली आहे.



बंदी हटवली

आरबीआयने आपल्या पत्रात म्हटले आहे की नोव्हेंबर २०२२ मध्ये पीपीएसएलवर नवीन व्यापारी जोडण्यावर लादलेली बंदी आता उठवण्यात आली आहे. मात्र, कंपनीला आता सिस्टम ऑडिट करावे लागेल. यामध्ये सायबर सुरक्षा ऑडिट देखील समाविष्ट असेल आणि सहा महिन्यांच्या आत आरबीआयला त्याचा अहवाल सादर करावा लागेल. असे झाले नाही तर ही तात्पुरती मान्यता आपोआप रद्द होईल आणि अंतिम मंजुरीचा विचार केला जाणार नाही. पेटीएमच्या व्यवस्थापनाने आधीच स्पष्ट केले होते की २०२२ मध्ये लादलेल्या या बंदीमुळे त्यांच्या सध्याच्या व्यवसायावर मोठा परिणाम होणार नाही. कारण ती फक्त नवीन ऑनलाइन व्यापाऱ्यांना ऑनबोर्डिंग करण्यावर लागू होती.



ब्रोकरेज हाऊसेसचे मत

ब्रोकरेज फर्म सिटीने Paytm च्या शेअर्सवर खरेदी रेटिंग कायम ठेवले आहे आणि १,२१५ रुपयांची लक्ष्य किंमत दिली आहे. सिटीचे म्हणणे आहे की जवळजवळ तीन वर्षांनंतर हा परवाना मिळणे ही एक सकारात्मक बातमी आहे आणि त्यामुळे कंपनीशी संबंधित एक मोठा नियामक अडथळा दूर होतो.



बर्नस्टीनने या शेअर्सला आउटपरफॉर्म रेटिंग देखील दिले आहे. परंतु त्याची लक्ष्य किंमत १,१०० रुपयांवर ठेवली आहे, जी सध्याच्या किमतीपेक्षा कमी आहे. बर्नस्टीनचा असा विश्वास आहे की या बातमीचा तात्काळ आर्थिक परिणाम मर्यादित असेल. परंतु दीर्घकाळात ते पेमेंट मार्जिन सुधारेल. कंपनी आता लहान व्यापाऱ्यांना ऑनबोर्ड करू शकेल, ज्यांना सहसा मोठ्या कॉर्पोरेट क्लायंटपेक्षा जास्त मार्जिन मिळते.



पेटीएम शेअर्स कव्हर करणाऱ्या एकूण १९ विश्लेषकांपैकी १० जणांनी पेटीएमला खरेदी रेटिंग आणि ५ विश्लेषकांनी होल्ड रेटिंग दिले आहे. ४ जणांनी सेल रेटिंग दिले आहे. दौलत कॅपिटलने पेटीएमसाठी सर्वाधिक लक्ष्य किंमत १,४०० रुपये दिली आहे.



शेअर्सची कामगिरी

पेटीएमचा शेअर्स ५३.५० रुपयांनी वाढून १,१७३.५० रुपयांवर व्यवहार करत आहे. गेल्या एका महिन्यात कंपनीचे शेअर्स १९ टक्के आणि गेल्या ६ महिन्यांत ५४ टक्के वाढले आहेत. मात्र अजूनही शेअर्सची किंमत २,१५० रुपयांच्या आयपीओ किमतीपेक्षा खूपच कमी आहे.