ஆசிரியர் தகுதித் தேர்வு சுருக்கமாக டெட் தேர்வு என்பது 1 முதல் 8-ம் வகுப்பு வரை கற்பிக்கும் இடைநிலை ஆசிரியர்கள் மற்றும் பட்டதாரி ஆசிரியர்களுக்கு தகுதித் தேர்வாக நடத்தப்படுகிறது. தமிழ்நாட்டில் இத்தேர்வை ஆசிரியர் தேர்வு வாரியம் (TRB) நடத்தி வருகிறது. இத்தேர்வு 2 தாள்கள் கொண்டு நடைபெறும். முதல் தாள் 1 முதல் 5-ம் வகுப்பு வரை உள்ள மாணவர்களுக்கு கற்பிக்க தகுதித்தாளாகவும், 2ஆம் தாள் 6 முதல் 8ஆம் வகுப்பு வரை உள்ள மாணவர்களுக்கு கற்பிக்கவும் நடத்தப்படுகிறது. தமிழ்நாட்டில் கடந்த 3 ஆண்டுகளாக இத்தேர்வு நடைபெறாத நிலையில், தொடர்ந்து கோரிக்கையின் மூலம் இந்தாண்டு நடத்த அறிவிப்பு வெளியாகியது.

2024-ம் ஆண்டு தேர்வு நடைபெறும் என எதிர்பார்த்த நிலையில், பல்வேறு காரணங்களால் அறிவிப்பு வெளியாகவில்லை. இந்தாண்டுக்கான டிஆர்பி ஆண்டு அட்டவணையில் இடம்பெறாதபோதிலும், ஆகஸ்ட் 11-ம் தேதி அறிவிப்பு வெளியிட்டு விண்ணப்பங்கள் பெறப்படுவதாக அறிவிக்கப்பட்டது.

டெட் தேர்வு மொழி தாளுடன் மொத்தம் 150 கேள்விகள் கொண்டு 3 மணி நேரம் நடைபெறும். கேள்விகள் கொள்குறி வகையில் (MCQ) அமையும். ஓஎம்ஆர் தாள் மூலம் தேர்வு நடத்தப்படும். இதில் குறைந்தபட்ச தேர்ச்சி மதிப்பெண்களாக 60 சதவீத மதிப்பெண்கள் பெற வேண்டும். எஸ்சி, பிசி, எம்பிசி பிரிவினர் 55 சதவீதமும், எஸ்டி 40 சதவீதமும் எடுக்க வேண்டும். இதனிடையே இந்த தேர்ச்சி சதவீதத்தை குறைக்க வேண்டும் என தேர்வர்கள் கோரிக்கை வைக்கின்றனர் என்பது குறிப்பிடத்தக்கது.

ஆசிரியர் பணிக்கான தகுதியான டெட் தேர்வை எழுத விரும்புகிறவர்கள் https://trb.tn.gov.in/ என்ற இணையதளத்தில் ஆன்லைன் வழியாக விண்ணப்பிக்க இன்று செப்டம்பர் 8-ம் தேதியே கடைசி நாள் ஆகும் என அறிவிக்கப்பட்ட நிலையில் ஆசிரியர் தகுதித் தேர்வுக்கு விண்ணப்பிக்க வரும் 10ம் தேதி வரை கால அவகாசம் நீட்டிப்பு என தகவல் வெளியாகியுள்ளது.

TET தேர்வுக்கு விண்ணப்பிப்பதற்கான கால அவகாசம் இன்று மாலை 5 மணியுடன் நிறைவடைய இருந்தது. 

ஆனால், பிற்பகல் முதலே சர்வர் பிரச்னை இருந்ததால் விண்ணப்பிக்க முடியாமல் பலரும் தவித்தனர்.

 இந்நிலையில், தேர்வுக்கு விண்ணப்பிப்பதற்கான அவகாசத்தை செப்.10 வரை விண்ணப்பிக்கலாம் என ஆசிரியர் தேர்வு வாரியம் அறிவித்துள்ளது.