அயர்லாந்தில் இந்தியர்களுக்கு எதிரான வெறுப்பு உணர்வு அதிகரித்து வரும் நிலையில், இணையத்தில் ஒரு இதயத்தைத் தொடும் வீடியோ வைரலாகி வருகிறது. இந்த வீடியோவில், ஒரு பெண் இந்தியர்கள் நடத்தும் கோமார்ட் கடையில் இந்திய கரன்சி நோட்டுகளை வைத்து பொருட்களை வாங்க முயற்சிக்கிறார். இந்த வேடிக்கையான தருணம் இணையத்தில் பரவி, பலரை சிரிக்க வைத்துள்ளது.

வீடியோவில், insta பிரபலமான அயர்லாந்து பெண் (@hello_accentmade), இந்திய ரூபாய் நோட்டுகளை கையில் வைத்து ஒரு இந்திய கடைக்காரரை கிண்டல் செய்ய திட்டமிடுவதாகக் கூறுகிறார். அவர் கடையில் தேவையான பொருட்களை எடுத்து, பணம் செலுத்தும் இடத்திற்கு செல்கிறார். பணம் கேட்கும் இந்திய ஊழியருக்கு ஆச்சரியமாக, அவர் இந்திய ரூபாய் நோட்டுகளை கொடுக்கிறார். இந்திய நோட்டு என்பதை உணர்ந்த ஊழியர் சிரித்து விட, அந்த தருணம் கேமராவில் பதிவாகிறது. பின்னர், அந்தப் பெண் இது ஒரு கிண்டல் என்றும், வீடியோ பதிவு செய்யப்படுவதாகவும் உடனடியாக கூறுகிறார்.

இந்த வீடியோவை பதிவேற்றிய @hello_accentmade, இந்திய கலாச்சாரம் தொடர்பான வைரல் உள்ளடக்கங்களுக்காக பிரபலமானவர். அவரது இன்ஸ்டாகிராம் பக்கத்தில் மற்றொரு வைரல் வீடியோவில், இந்தியாவில் தனது பயணத்தின் போது அந்நியர்களான இந்தியர்கள் தனது குழந்தையை அன்பாகவும், இன்முகத்துடனும் நடத்தியதைப் பற்றி பேசுகிறார். “இந்தியாவின் இந்தப் பக்கத்தைப் பற்றி ஏன் யாரும் பேசவில்லை” என்று அவர் அந்த வீடியோவை விவரிக்கிறார்.