நகராட்சி நிர்வாகம் மற்றும் குடிநீர் வழங்கல் துறையில் ₹888 கோடி லஞ்சம் பெற்று 2,538 பேர் நியமிக்கப்பட்டதாக அமலாக்கத் துறை எழுதிய கடிதம் பெரும் பரபரப்பை ஏற்படுத்தியுள்ளது. இதற்குத் தமது விளக்கத்தை வழங்கிய அமைச்சர் கே.என். நேரு, இது அரசுக்கு அவப்பெயர் உண்டாக்கும் நோக்கில் மத்திய அரசின் அரசியல் முயற்சி என கடுமையாகக் கண்டித்துள்ளார்.

அமலாக்கத் துறை எழுதிய கடிதத்தில், 2,538 பேர் பணியிட நியமனத்தில் லஞ்சம் பெற்றதாக கூறப்பட்டுள்ளது. இதையடுத்து, அமைச்சர் கே.என்.நேரு வெளியிட்ட அறிக்கையில், “இது பல ஆண்டுகள் பழைய வங்கி வழக்கை தூசு தட்டி எடுத்து, ஊதிப் பெரிதாக்கிய மத்திய அரசின் அரசியல் நாடகம் மட்டுமே,” என தெரிவித்துள்ளார்.

அவர் கூறியதாவது:“2011 முதல் 2021 வரை அதிமுக ஆட்சிக் காலத்தில் நியமனங்கள் குறைந்ததால், காலிப் பணியிடங்கள் அதிகரித்தன. அதனை சரிசெய்யும் வகையில், 2024 பிப்ரவரி 2-ஆம் தேதி அண்ணா பல்கலைக்கழகம் மூலமாக வெளிப்படையான தேர்வு அறிவிப்பு வெளியிடப்பட்டது.

மொத்தம் 2,569 பணியிடங்களுக்காக 2.49 லட்சம் விண்ணப்பங்கள் பெறப்பட்டன. அண்ணா பல்கலைக்கழகம் மூலம் 38 மாவட்டங்களில் 591 மையங்களில் தேர்வுகள் நடத்தப்பட்டன. 2024 செப்டம்பர் 20 அன்று தேர்வு முடிவுகள் வெளியிடப்பட்டன.

இந்த தேர்வுகளில் பங்கேற்ற லட்சக்கணக்கான விண்ணப்பதாரர்களிடமிருந்து ஒரு ஆட்சேபணையும் வரவில்லை என்பது குறிப்பிடத்தக்கது. பிறகு சான்றிதழ் சரிபார்ப்பு, நேர்முகத் தேர்வுகள் போன்ற அனைத்தும் முடிந்த நிலையில், 2,538 பேர் இறுதியாக தேர்வு செய்யப்பட்டனர்.

இத்தேர்வில் எந்த முறைகேடும் நடக்கவில்லை என்பதை உச்சநீதிமன்றமும் உறுதிப்படுத்தி, 2025 ஜூலை 4 அன்று தடையுத்தரவுகளை ரத்து செய்தது. அதன் பின்னரே முதலமைச்சர் நேரடியாக பணியாணைகளை வழங்கினார்,” என கூறினார்.

அவர் மேலும் கூறியதாவது:
“இந்தத் தேர்வுகள் அனைத்தும் அண்ணா பல்கலைக்கழகம் மூலமாகவே நடந்தன. அது ஒரு சுயாட்சி கல்வி நிறுவனம் — அரசியல் தலையீடு அங்கு இல்லை. முந்தைய ஆட்சிக் காலத்திலும் இதே பல்கலைக்கழகம் மூலமாகவே தேர்வுகள் நடத்தப்பட்டன.

இப்போது மட்டுமே முறைகேடு நடந்ததாகக் கூறுவது நகைப்புக்குரியது. இரண்டு லட்சம் பேர் தேர்வு எழுதிய நிலையில், இவ்வாறு களங்கம் கற்பிப்பது ஒருபோதும் வெற்றி பெறாது,” என அவர் வலியுறுத்தினார்.

அமலாக்கத் துறை கடிதத்தை அரசியல் நோக்கத்தோடு செய்யப்பட்ட நடவடிக்கையாக குறிப்பிட்ட அவர், “இத்தகைய முயற்சிகளை வன்மையாகக் கண்டிக்கிறேன். அவற்றை முறியடிக்க தேவையான அனைத்து சட்ட நடவடிக்கைகளையும் மேற்கொள்வோம்,” எனத் தெரிவித்தார்.

இந்த விளக்கத்துடன், ₹888 கோடி நியமன வழக்கு தற்போது தமிழக அரசியல் களத்தில் பெரும் விவாதமாக மாறியுள்ளது.