मुंबई : देशातील सर्वात मोठी विमा कंपनी भारतीय जीवन विमा महामंडळ (LIC) ने सप्टेंबर तिमाहीत शेअर बाजारात अनेक महत्त्वपूर्ण गुंतवणूक केली. परदेशी गुंतवणूकदारांकडून मोठ्या प्रमाणात विक्री आणि शेअर बाजारात सुरू असलेल्या अस्थिरतेदरम्यान LIC ने जोरदार खरेदी केली. यामुळे शेअर बाजाराला आधार आणि स्थिरता मिळाली. सप्टेंबर तिमाहीत एलआयसीने २१,७०० कोटींपेक्षा जास्त निव्वळ खरेदी केली. या काळात, कंपनीने ७६ सूचीबद्ध कंपन्यांमधील आपला हिस्सा वाढवला. तर ८१ कंपन्यांमधील हिस्सा कमी केला. तसेच पहिल्यांदाच १३ नवीन कंपन्यांमध्ये गुंतवणूक केली.



मात्र या काळात ३१ कंपन्यांच्या शेअरहोल्डिंग पॅटर्नमधून LIC चे नाव गायब झाले आहे. एलआयसीने सर्व ३१ कंपन्यांमधील आपला संपूर्ण हिस्सा विकला की १% पेक्षा कमी केला हे स्पष्ट नाही. महत्त्वपूर्ण खरेदी असूनही LIC च्या एकूण इक्विटी पोर्टफोलिओचे बाजार मूल्य सप्टेंबर तिमाहीत १.७% ने घसरून १६.०९ लाख कोटी रुपये झाले. मागील तिमाहीत हे मूल्य १६.३६ लाख कोटी रुपये होते. सप्टेंबर तिमाहीच्या अखेरीस, एलआयसीने ३२२ सूचीबद्ध कंपन्यांमध्ये हिस्सेदारी ठेवली.



एलआयसीचा सर्वात मोठा हिस्सा स्टेट बँक ऑफ इंडिया (एसबीआय) मध्ये होता. एसबीआयचे एलआयसीने ५,५९९ कोटी रुपयांचे ६.४२ कोटी अतिरिक्त शेअर्स खरेदी केले. एलआयसीने सन फार्मास्युटिकल्स आणि एचसीएल टेक्नॉलॉजीजमध्येही आपला हिस्सा वाढवला. या कंपन्यांचे अनुक्रमे ३,२२६ कोटी आणि २,९३९ कोटी रुपये किमतीचे शेअर्स खरेदी केले.



इतर कंपन्यांमध्ये एलआयसीने पिडिलाईट इंडस्ट्रीजमध्ये २,२३४ कोटी रुपये, कोल इंडियामध्ये २,११९ कोटी, एनटीपीसीमध्ये १,९९२ कोटी, टाटा मोटर्स पॅसेंजर व्हेइकल्समध्ये १,९०४ कोटी, सिप्लामध्ये १,६८६ कोटी आणि टाटा कन्सल्टन्सी सर्व्हिसेसमध्ये १,६५४ कोटी रुपये किमतीचे शेअर्स खरेदी केले.



सप्टेंबर तिमाहीत एलआयसीने अनेक नवीन गुंतवणूक केली. सर्वात मोठी नवीन गुंतवणूक बीएसई लिमिटेडमध्ये झाली, बीएसई लिमिटेडचे एलआयसीने ४,६३७ कोटींना २.२८ कोटी शेअर्स खरेदी केले. तर येस बँकेत २,६५३ कोटी, एबीबी इंडियामध्ये २,४२४ कोटी, वरुण बेव्हरेजेसमध्ये १,९८२ कोटी, श्रीराम फायनान्समध्ये १,४९२ कोटी आणि पर्सिस्टंट सिस्टम्समध्ये ८१९ कोटी रुपयांची गुंतवणूक केली.



एलआयसीने सप्टेंबरमध्ये एचडीएफसी बँकेत सर्वात मोठी गुंतवणूक केली. एचडीएफसी बँकेचे ३,१३० कोटी रुपये किमतीचे शेअर्स विकले. याशिवाय, आयसीआयसीआय बँकेत २,३३८ कोटी, लार्सन अँड टुब्रो (एल अँड टी) मध्ये २,२४३ कोटी, भारती एअरटेलमध्ये २,२०५ कोटी, महिंद्रा अँड महिंद्रामध्ये २,१४९ कोटी, मारुती सुझुकीत २,०५२ कोटी आणि कोटक महिंद्रा बँकेत १,९९४ कोटी रुपयांची गुंतवणूक केली.