मुंबई: भारतीय शेअर बाजारात व्यवहार करणाऱ्यांसाठी महत्वाची अपडेट आहे. शीख बांधवांचा महत्त्वाचा सण 'गुरुनानक जयंती' यावर्षी बुधवार, 5 नोव्हेंबर 2025 रोजी आहे. या पावन पर्वानिमित्त शेअर बाजार पूर्णपणे बंद राहणार आहे.



राष्ट्रीय शेअर बाजार (NSE) आणि बॉम्बे स्टॉक एक्सचेंज (BSE) वरील सर्व विभागांमधील व्यवहार 5 नोव्हेंबर रोजी बंद राहतील. यामध्ये इक्विटी, फ्युचर्स आणि ऑप्शन्स, सिक्युरिटीज लेंडिंग आणि करन्सी डेरिव्हेटिव्ह्जचा समावेश आहे. या वर्षातील घोषित 14 सुट्ट्यांपैकी ही दुसरी महत्त्वाची सुट्टी आहे, जी 15 ऑगस्टच्या स्वातंत्र्यदिनाच्या सुट्टीनंतर येत आहे. यानंतर वर्षाची शेवटची सुट्टी 25 डिसेंबर (ख्रिसमस) रोजी असेल.



गुंतवणूकदारांसाठी परिणाम : बुधवारी बाजार बंद असल्याने सर्व गुंतवणूकदार आणि व्यापाऱ्यांना आता गुरुवार, 6 नोव्हेंबरपर्यंत बाजार पुन्हा सुरू होण्याची वाट पाहावी लागणार आहे. गुंतवणूकदारांनी बाजारातील या सुट्टीच्या दिवसांचा विचार करूनच आपल्या गुंतवणुकीचे नियोजन करणे महत्त्वाचे आहे.



MCX व्यवहाराचे वेळापत्रक : कमोडिटी बाजारातही काही बदल असतील. मल्टी-कमोडिटी एक्सचेंज (MCX) मध्ये 5 नोव्हेंबर रोजी फक्त सकाळच्या सत्रात कामकाज थांबवले जाईल. मात्र, MCX चे संध्याकाळचे सत्र नियमितपणे सुरू राहील.



प्रकाश पर्वाचे महत्त्व प्रकाश पर्व म्हणजेच आज 5 नोव्हेंबर 2025 रोजी शीख धर्माचे संस्थापक गुरुनानक देव जी यांची 556 वी जयंती आहे, ज्याला गुरपूरब किंवा प्रकाश पर्व असेही म्हणतात. हिंदू कॅलेंडरनुसार कार्तिक पौर्णिमेला हा सण साजरा होतो. गुरुनानक देव जी यांनी दिलेला समानता, निस्वार्थ सेवा आणि भक्तीचा संदेश म्हणून आजचा दिवस साजरा केला जातो. या दिवशी 48 तासांच्या अखंड पाठासह, नगर कीर्तन आणि सामुदायिक लंगरचे आयोजन केले जाते.