அமெரிக்காவின் விஸ்கான்சின் மாநிலத்தைச் சேர்ந்த 26 வயதான மெடிசன் அசிவேடோ என்ற இளம்பெண், தனது திருமணத்தன்று துளிக்கூட மேக்கப் செய்து கொள்ளாமல் மணமேடை ஏறிய வீடியோ இணையதளங்களில் பல மில்லியன் பார்வைகளைக் கடந்து பெரும் விவாதத்தை ஏற்படுத்தியுள்ளது. கடந்த அக்டோபர் மாதம் நடைபெற்ற தனது திருமணத்தில், தான் எப்போதும் எப்படி இருப்பேனோ அதே இயல்பான தோற்றத்தில் கணவரை மணக்க விரும்புவதாக அவர் தெரிவித்துள்ளார்.

சிறுவயதில் முகப்பருக்களை மறைப்பதற்காக அதிகப்படியான அழகு சாதனங்களைப் பயன்படுத்திய கசப்பான அனுபவம் இருந்ததால், தனது வாழ்வின் மிக முக்கியமான நாளில் செயற்கையான தோற்றம் தேவையில்லை என அவர் முடிவு செய்துள்ளார். எளிமையான ஆடை மற்றும் பழங்கால பாணி அலங்காரங்களுடன் நடைபெற்ற இந்தத் திருமணத்தில், மணப்பெண்ணின் இந்தத் தன்னம்பிக்கையான முடிவை அவரது கணவரும் முழுமனதாக ஆதரித்துப் பாராட்டியுள்ளார்.