2025 हे वर्ष संपत आले असून या वर्षात क्रिकेटच्या मैदानावर अनेक अविश्वसनीय विक्रम प्रस्थापित झाले. काही विक्रम 148 वर्षांच्या कसोटी इतिहासात पहिल्यांदाच घडले, तर काही आयपीएलच्या (IPL) मैदानावर नोंदवले गेले आहेत.

कसोटी इतिहासातील 148 वर्षांतील पहिलीच घटना
भारत आणि दक्षिण आफ्रिका यांच्यातील WTC फायनलमध्ये एक आगळावेगळा विक्रम झाला. कसोटी क्रिकेटच्या 148 वर्षांच्या इतिहासात आणि सुमारे 2561 सामन्यांनंतर पहिल्यांदाच असे घडले की, दोन्ही संघांचे सलामीवीर (Openers) शून्यावर बाद झाले. पहिल्या डावात ऑस्ट्रेलियाचा उस्मान ख्वाजा आणि दक्षिण आफ्रिकेचा एडन मार्करम यांना खातेही उघडता आले नाही.

आयपीएलमधील सर्वात तरुण शतकवीर: वैभव सूर्यवंशी
14 वर्षीय वैभव सूर्यवंशीने (Vaibhav Suryavanshi) यंदाच्या आयपीएलमध्ये सर्वांचे लक्ष वेधून घेतले. आपल्या कारकिर्दीतील पहिल्याच चेंडूवर शार्दुल ठाकूरला षटकार मारणाऱ्या वैभवने केवळ 14 वर्षे 31 दिवस वयाचा असताना राजस्थानसाठी शतक झळकावले. गुजरातविरुद्ध अवघ्या 35 चेंडूत 7 चौकार आणि 11 षटकारांच्या मदतीने त्याने हे शतक पूर्ण केले, जो आयपीएल इतिहासातील एक मोठा विक्रम ठरला.

आयपीएलमध्ये सर्वात कमी धावसंख्येचा बचाव
15 एप्रिल रोजी चंदीगडमध्ये झालेल्या सामन्यात पंजाबचा संघ प्रथम फलंदाजी करताना अवघ्या 111 धावांत गारद झाला. मात्र, केकेआर (KKR) सारखा तगडा संघ या धावसंख्येचा पाठलाग करताना 95 धावांवरच बाद झाला. आयपीएलच्या 17 वर्षांच्या इतिहासात इतक्या कमी धावसंख्येचा यशस्वी बचाव करण्याची ही पहिलीच वेळ होती.

पाकिस्तानचा टी-20 मध्ये नवा जागतिक विक्रम
पाकिस्तान संघाने 2025 मध्ये टी-20 फॉरमॅटमध्ये आपली ताकद दाखवली. एका कॅलेंडर वर्षात सर्वाधिक टी-20 सामने जिंकण्याचा विक्रम त्यांनी केला. सलमान आगाच्या नेतृत्वाखाली पाकिस्तानने या वर्षी 34 सामने खेळले, त्यापैकी 21 सामन्यांत विजय मिळवला. यात श्रीलंका आणि बांगलादेशविरुद्धच्या मालिका विजयांचा मोठा वाटा आहे.

अभिषेक शर्माची ‘वानखेडे’वर फटकेबाजी
भारतीय सलामीवीर अभिषेक शर्माने 2 फेब्रुवारी रोजी इंग्लंडविरुद्ध वानखेडे स्टेडियमवर वादळी खेळी केली. त्याने केवळ 54 चेंडूत 135 धावा ठोकल्या. या खेळीत त्याने 13 षटकार मारले. त्याने अवघ्या 17 चेंडूत अर्धशतक आणि 37 चेंडूत शतक पूर्ण केले. भारतासाठी ही दुसरी सर्वात वेगवान शतकी खेळी ठरली.