தமிழக சட்டசபைத் தேர்தலுக்கு இன்னும் சில மாதங்களே உள்ள நிலையில், தமிழக காங்கிரஸ் கட்சிக்குள் ஏற்பட்டுள்ள உட்கட்சி பூசல் மற்றும் கூட்டணி குழப்பங்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளது.

கரூர் தொகுதி நாடாளுமன்ற உறுப்பினர் ஜோதிமணி தனது சமூக வலைதளப் பக்கத்தில் வெளியிட்டுள்ள பதிவு காங்கிரஸ் கட்சியினரிடையே அதிர்ச்சியை ஏற்படுத்தியுள்ளது. அதில், “ஒரு சிலரின் சுயநலத்திற்காக தமிழக காங்கிரஸ் கொஞ்சம் கொஞ்சமாக அழிவின் பாதையில் சென்று கொண்டிருக்கிறது” என அவர் பகிரங்கமாகத் தெரிவித்துள்ளார்.

குறிப்பாக, கட்சிப் பதவிகள் மற்றும் தேர்தல் முகவர் நியமனங்களில் வெளிப்படைத்தன்மை இல்லை என்பதைச் சுட்டிக்காட்டும் வகையில் அவரது கருத்து அமைந்திருந்தது.

ஜோதிமணியின் இந்தப் பதிவிற்குப் பதிலளிக்கும் வகையில் தமிழக காங்கிரஸ் கமிட்டித் தலைவர் செல்வப்பெருந்தகை சென்னையில் செய்தியாளர்களைச் சந்தித்தார். அப்போது அவர் கூறியதாவது:

“சகோதரி ஜோதிமணியின் இந்தப் பதிவு எனக்கு மிகுந்த அதிர்ச்சியையும், வருத்தத்தையும் அளிக்கிறது. கரூர் மாவட்ட தேர்தல் படிவம் மற்றும் முகவர் நியமனம் தொடர்பாக சில பிரச்சினைகள் இருந்தது உண்மைதான். இது குறித்து ஏற்கனவே கட்சி மேலிடத்திற்குத் தெரியப்படுத்தியுள்ளோம். மேலிடத்திலிருந்து இன்னும் முறையான பதில் வராத நிலையில், அவர் இப்படிப் பொதுவெளியில் பதிவிட்டது ஆச்சரியமாக இருக்கிறது என்றார்.

திமுகவுடன் கூட்டணி பேச்சுவார்த்தை நடத்த ஒருபுறம் குழு அமைக்கப்பட்டிருந்தாலும், மறுபுறம் காங்கிரஸ் நிர்வாகிகள் சிலர் திமுகவை மறைமுகமாக விமர்சித்து வருகின்றனர். அதேவேளையில், விஜய்யின் தமிழக வெற்றிக் கழகத்துடன் (தவெக) கூட்டணி அமைக்கலாம் என ஒரு தரப்பினர் குரல் கொடுத்து வருவது கூட்டணியில் சலசலப்பை உருவாக்கியுள்ளது.

2011-ல் 63 தொகுதிகளில் போட்டியிட்ட காங்கிரஸ், 2021-ல் வெறும் 25 தொகுதிகளில் மட்டுமே போட்டியிடும் நிலைக்குத் தள்ளப்பட்டது. தொடர்ச்சியாகத் தொகுதிகள் குறைக்கப்பட்டு வருவதால், தமிழகத்தில் காங்கிரஸின் வளர்ச்சி கேள்விக்குறியாகி இருப்பதாக அரசியல் விமர்சகர்கள் கருதுகின்றனர்.

சட்டசபைத் தேர்தல் நெருங்கும் வேளையில், உட்கட்சி பூசலும் கூட்டணி குறித்த தெளிவற்ற நிலையும் தமிழக காங்கிரஸைப் பலவீனப்படுத்தும் எனத் தொண்டர்கள் கவலை தெரிவித்துள்ளனர்.